Bakıda xüsusi karantin rejimi səbəbindən metronun bağlanması ictimai nəqliyyatda sıxlığı günbəgün artırır.
Tibb üzrə professor Adil Qeybulla “Yeni Müsavat”a bildirib ki, karantin dövründə sosial həyatın ən uğursuz sahəsi ictimai nəqliyyat oldu.
Onun sözlərinə görə, burada obyektiv səbəblər də var və metronun bağlanması avtobusların yükünü artırdı: “Amma nəzarəti gücləndirmək, avtobusların sayını artırmaq olardı. Gedib maşınların dayanma-durma qaydasını pozmağını çəkməkdənsə, öz enerjilərini bu sahəyə mobilizasiya etsəydilər yaxşı olardı”.
Həkim hesab edir ki, bütün avtobusların girişində dezinfeksiyaedici məhlul olmalıydı, hər kəs birmənalı maska taxmalıydı, sosial məsafə gözlənməliydi: “Amma bir çox hallarda bunlar olmadı. Virusa yoluxmanın qarşısını almaq üçün əsas məsələ karantin qaydalarına riayət etməkdir. Bu da olmayanda yoluxmaya təsir edir”.
A.Qeybulla qeyd edib ki, məhz avtobuslarda yoluxma ilə bağlı statistika yoxdur: “Yoluxmanın yerini, mənşəyini müəyyən etmək olmur. Amma yoluxma sıx təmas olan məkanlarda baş verir və biri də avtobuslardır.
Son günlərdə ölkədə yoluxmanın artmasının da səbəbi qaydalara lazımı səviyyədə riayət edilməməsidir. Bu, hamıya şamil deyil, ancaq baxırsan ki, vətəndaş marketə girir, maska çənəsində, burun açıq…Əlbəttə, bu da öz təsirini yoluxma sayında göstərəcək”.
