Bakının 20 Yanvar küçəsi, 22 ünvanda yaşayan sakinlər qanunsuz tikintiyə etiraz edirlər. Bu haqda jurnalist Arifə Əliyeva feysbuk üzərindən canlı yayım edib.
“Qızıl tac” restoranı yaxınlığında, iki bina arasında yerləşən Fövqəladə Hallar Nazirliyinə məxsus su anbarının üstündə yaşayış binası inşa olunur.
Sakinlər FHN-ə müraciət etdikdən sonra əraziyə baxış keçirilib və nazirlik tərəfindən tikinti dayandırılıb. Lakin iyunun 9-da təzədən tikinti davam etdirilib.
Bu dəfə sakinlərin şikayət etməsini və çəkiliş aparmasını görən iş icraçıları dərhal tikintini dayandırıblar, dəmir hasarlar bağlayıblar.
Şikayətçilər deyirlər ki, tikintini Abbas Hüseynov adlı fiziki şəxs aparır və ərazidə ağacları məhv edib.
O, Nəsimi Rayon İcra Hakimiyyətindən tikintiyə icazə sərəncamı aldığını desə də, sakinlərə sənədin yalnız surətini göstərir, orjininalını isə təqdim etmir.
Hadisə yerində olan jurnalistə açıqlama verən A.Hüseynov bildirib ki, tikintiyə icazə sənədi ona məxsus ofisdədir və təqdim etməyə hazırdır.
O, FHN-ə aid su anbarının köhnə və istifadəsiz olduğunu bildirib. Tikinti sahibi ərazidə 5 mərtəbəli bina inşa etdiyini və ərazinin abadlaşdıracağını söyləyib.
Halbuki, FHN-a aid su anbarının üstündə qanunsuz tikinti aparılır və nazirlik də buna imkan verməyib. Ancaq sahibkar Nəsimi icra başçısı Asif Əsgərovla necə anlaşıbsa, iki yaşayış binasının tən ortasını alaraq bina inşa edir.

Qeyd edək ki, son illərdə A.Əsgərov Nəsimi rayonunda satmadığı yaşıllıq, binaların həyətləri, yollar, səkilər qalmayıb.

AzEuroNews.com