XalqXəbər.Az

www.XALQXEBER.az » Sosial » Xırdalanda piyada yolu üzərində tikinti! – “İcra başçısının qardaşı oğlu tikir” – FOTO

Xırdalanda piyada yolu üzərində tikinti! – “İcra başçısının qardaşı oğlu tikir” – FOTO

Xırdalanda piyada yolu üzərində tikinti! – “İcra başçısının qardaşı oğlu tikir” – FOTO
9-01-2018, 10:10

Bakının, necə deyərlər, qızıldan qiymətli torpaqlarının necə gəldi, kimə gəldi satılması yerli məmurların, icra hakimiyyətlərinin əsas gəlir mənbəyidir. Qanunsuz torpaq alveri icra başçılarının əsas gəlir mənbəyi olmaqla yanaşı, Bakı sakinlərini ən çox narazı salan məsələlərdən də biridir. Çünki bu alver heç bir qayda-qanuna, şəhərsalma prinsipinə söykənmədiyindən əksər hallarda sakinlərin həyatını, yaşayışını ağırlaşdırır, tədricən Bakını yaşanılmaz bir məkana çevirir.
Bir neçə il əvvələdək bu proses o qədər də ciddi ictimai narazılıq doğurmurdu, çünki Bakıda boş torpaqlar hələ kifayət qədər idi və bu boş torpaqlarda tikintilər əhalinin maraqlarını çox da tapdamırdı. Maneə olmadığından icra hakimiyyətləri də bu boş torpaqları hərraca çıxarır, heç bir problem olmadan istədikləri kimi sərəncamlar verirdilər. Lakin getdikcə boş, satışa yararlı torpaqların tükənməsilə bu haqq-hüquq tanımaz alver daha da azğın xarakter almağa, yaşıllıqların, istirahət güşələrinin, idman meydançalarının, məktəb ərazilərinin, yolların, səkilərin üzərinə hücumlarla müşayiət olunmağa başlayıb. Əksər vaxtlarda isə nə sakinlərin etirazları, nə medianın müdaxiləsi, nə də yuxarı orqanlara şikayətlər bu azğınlığın qarşısını ala bilir. Nədən ki, Bakının qarış-qarış satılması prosesinin arxasında elə “yuxarıdakı” qüdrətli çevrələr durur…
Sakinlərin verdikləri məlumata görə, növbəti belə torpaq “işğalı” Abşeron rayonu ərazisində – Xırdalanda baş verir. Bu dəfə də hədəf yaşıllıq və hətta piyada yoludur! Artıq bir neçə gündür Xırdalanın düz mərkəzində – Heydər Əliyev prospekti 156 ünvanında sözün əsl mənasında özbaşınalıq baş verir. Minlərlə insanın gözü qarşısında yaşıllıq məhv edilir, düz piyada yolunun üstündə obyekt tikintisinə vurçatlasın hazırlıq gedir. Ətrafda yaşayan Xırdalan sakinlərinin çırpınması, ora-bura şikayətləri isə həmişə olduğu kimi, nəticəsizdir – çax-çax baş ağrıdır, dəyirman öz işindədir!
Məlumata görə, onlarla ağacın məhv olunması, piyada yolunun zəbti hesabına bu ərazidə 3 ikimərtəbəli obyektin tikintisi planlaşdırılır. Sakinlərin iddiasına görə, bu obyektlərdən birini Səbael rayon İcra Hakimiyyətinin başçısı Eldar Əzizovun əvvəllər Abşeron rayon İcra Hakimiyyətində işləyən qardaşı oğlunun tikəcəyi haqda söz-söhbətlər dolaşır. Digər ikisinin ərazisini kim alıb, nə tikəcək – məlum deyil.
Sakinlər Xırdalanın mərkəzində ümumi görünüşə xələl gətirən, yaşıllığın və piyada yolunun məhv olunması hesabına aparılan bu tikintinin dayandırılması xahişilə ölkə rəhbərliyinə müraciət ünvanlayıblar.

“AzPolitika”

Xırdalanda piyada yolu üzərində tikinti! – “İcra başçısının qardaşı oğlu tikir” – FOTO
Xırdalanda piyada yolu üzərində tikinti! – “İcra başçısının qardaşı oğlu tikir” – FOTO

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.