Heydər Əliyev Fondunun vitse-prezidenti, Rusiyanın Azərbaycanlı Gənclər Birliyinin (AMOR) sədri Leyla Əliyevanın təşəbbüsüi ilə Moskvada “Qanın milləti yoxdur” adlı növbəti xeyriyyə aksiyası keçirilib.
Moskva müxbirinə istinadən verdiyimiz məlumata görə, İ.M.Seçenov adına Birinci Moskva Dövlət Tibb Universitetinin dəstəyilə baş tutan aksiya universitetin kliniki transfuziologiya və hematologiya kafedrasında təşkil edilib.
Qanvermə aksiyası hər il iyunun 14-də - Dünya Qan Donoru Günü keçirilir. Bu il isə aksiyanın bu vaxt keçirilməsinə səbəb qan xəstəliklərindən əziyyət çəkən insanların yardım göstərilməsi xahişi ilə AMOR rəhbərliyinə ünvanlanan çoxsaylı məktublarıdır. Müraciət edənlərin böyük əksəriyyəti donor qanına ehtiyacı olan uşaqlardır.
Aksiya zamanı 80-dən çox insan hemofiliya və digər qan xəstəliklərindən əziyyət çəkənlər üçün qan veriblər. Aksiyada Azərbaycan, Rusiya, Malayziya, İndoneziya, Misir, Çin, Özbəkistan, Gürcüstan və digər ölkələrdən tələbələr iştirak ediblər.
Tədbirin əsas təşkilatçılarından biri, AMOR İdarə Heyətinin üzvü, tibb elmləri namizədi Samir Əliyev bildrib ki, aksiyada iştirak edənlər bir tərəfdən öz sağlamlıq durumu haqqında məlumat alır, digər tərəfdən, qana ehtiyacı olan insanlara kömək etməklə xeyirxah iş görürlər: “Qanın milləti yoxdur” aksiyalarında hər il yüzlərlə gənc iştirak edir, toplanmış qan isə xəstələrin müalicəsinə yönəldilir".