Əmlak Komitəsinin şöbə müdiri Fərahim Mirzəyev haqda şikayətlər səngimir
Əmlak Məsələləri Dövlət Komitəsinin Torpaqlardan istifadəyə və mühafizəsinə dövlət nəzarətinin təşkili şöbəsinin müdiri Fərahim Mirzəyevin fəaliyyətindən bəhs edən yazımız oxucuların böyük marağına səbəb olub.
Redaksiyamıza müraciət edən şəxslər F.Mirəzyevin Əmlak Komitəsinin işinə həqiqətən də kölgə saldığını və onun vətəndaşlarda bu qurumun korrupsiya yuvasına çevrildiyi barədə təsəvvürlər yaradan əsas adamlardan biri olduğunu bildirirlər. Qəribədir ki, F.Mirzəyev barədə müsbət fikir söyləyən bir kimsəyə rast gəlmək olmur. Əmlak Məsələləri Dövlət Komitəsinə müraciət etmiş istənilən şəxsə F.Mirzəyev barədə sual ünvanlayanda, birmənalı və oxşar cavablar alınır: “Onun bildiyi bir söz var: Gətir”.
Yəqin ki, aydındır, “Gətir” deyilərkən nəzərdə tutulan heç də şokolad qutusu deyil. Üstəlik, deyilənə görə, F.Mirzəyev “Gətir” sözünü bəzən çox möhkəmdən deyir və vətəndaşlar şöbə müdirinin avazına tab gətirə bilmirlər. Nəticədə onun kabinetinin önündə uzun növbələr yaranır, insanlar get-gələ salınaraq, bu dövlət qurumundan narazı düşürlər...
...Və sanki F.Mirzəyevin əsas məqsədi də budur. Bir nəfər haqqında bunca ittihamlar səsləndirilirsə, bir şöbə müdirinin qanunsuz tələbləri barədə uzun-uzadı bəhs edənlərin sayı kifayət qədər çoxdursa və bütün bunlara rəgmən o öz işini davam etdirərək, “Arxamda Kərəm Həsənov dayanır" deyirsə, deməli bu, dolayısı ilə həm də insanların əsəblərini tarıma çəkmək, şikayətçiləri KİV-lərə istiqamətləndirib Kərəm Həsənovu korrupsioner kimi təqdim etməyə hesablanıb. Yoxsa bir şöbə müdiri təmsil olunduğu dövlət qurumu barədə bu qədər ağır ittihamların yayılmasına, şikayətlərin artmasına niyə maraq göstərsin ki? Normalda hər şey tərsinə olmalı idi. İşlədiyi yerin təəsübünü çəkən adam barəsində söylənilən suclamalardan və mətbuatda səsləndirilən şikayətlərdə n nəticə çıxarmalı və öz davranışlarında mümkün korrektələr etməlidir. Belə adamlar istəməzlər ki, müdirləri, sədrləri və ya nazirləri məhz onların qanunsuz əməllərinə görə mətbuatın gündəminə gəlsinlər, əhali arasında “rüşvətxor və korrupsioner” məmur kimi tanınaraq lənət və qınaq ünvanına çevrilsinlər. Yox əgər F.Mirzəyev bunu istəyirsə, deməli onun davranış və əməllərində qeyri-adi nəsə axtarmağa dəyməz. O, bütün mümkün cəhdlərdən istifadə edərək öz rəhbərinə, öz qurumuna və öz hökumətinə qarşı narazılıqların artmasına çalışacaq və əslində bu gün vətəndaşların dilindən səslənən ittihamlar da göstərir ki, cənab şöbə müdiri öz halını dəyişmək fikrində deyil. Olsun, F.Mirzəyev öz işində, biz də öz işimizdə olub vətəndaşların şikayətini dinləməkdən yorulmayacağıq.
***
Gələk konkret şikayətlərə və ittihamların predmetinə. Şikayətçilər iddia edirlər ki, F.Mirzəyev müvafiq əmlak sənədlərinin hazırlanmasına görə müraciət edən şəxslərdən fantastik məbləğlər tələb edir və bu alınmayanda sənədləşmə prosesinin mümkün qədər uzanmasına və sonra tamamilə imtina olunmasına çalışır.
Maraqlıdır ki, bu barədə iki-üç ilə əvvəl də mətbuat yazırdı və indi aradan bu qədər vaxt keçməsinə baxmayaraq F.Mirzəyev yenə də öz ampluasındadır. O yenə hamıya “Gətir” deyir. Halbu ki, F.Mirzəyev indi tamam başqa ünvanlardan boy verməliydi...
Məlumatlı şəxslərin sözlərinə görə, hazırda əmlak məsələlərinə dair sənədləşmə işlərilə məşğul olan vətəndaşlar əsasən bir nəfərin fəaliyyətindən və qanunsuz tələbetmələrindən gileylənirlər və bunu yuxarıdakılar da bilməmiş deyillər: “Necə ola bilər ki, Kərəm Həsənov Fərahim Mirzəyevin əməllərindən xəbər tutmasın? Əmlak Komitəsinin binasının həndəvərində qanad çalan quşların gün ərzində nə qədər məsafə qət etdiklərini də komitədə əzbər bilirlər. Təsəvvür edin ki, Fərahim Mirzəyev hər yerdə deyir ki, onun arxasında Kərəm Həsənov dayanıb və ona görə də kimsə ona gözün üstə qaşın var deyə bilməz. Hələ üstəlik vətəndaşlara deyir ki, o, özbaşına heç bir iş görmür, bütün addmları və tələbləri bilavasitə rəhbərliyin iradəsinə söykənir. Onun düz danışıb-danışmadığını deyə bilmərik. Ola bilər ki, öz əməllərini pərdələmək üçün belə deyir. Amma qəribədir ki, hörmətli Kərəm müəllim bütün bunlardan xəbər tuta bilmir. Tabeçiliyində olan şəxsi yanına çağırıb tənbeh etmir, bu boyda dövlət komitəsi barədə insanlarda möhkəmlənmiş xoşagəlməz qənaətlərin dağıdılmasına maraq göstərmir. Yəni doğrudanmı Fərahim Mirzəyev vətəndaşlardan qanunsuz nələrsə tələb edəndə bundan yuxarıların xəbəri olur? Hər halda biz inanmaq istəmirik ki, Fərahim Mirzəyevin dedikləri doğrudur və o, həqiqətən də Kərəm müəllimin sağ əlidir. Biz ona inanrıq ki, Fərahim Mirəzəyevin fəaliyyəti nəhayət Kərəm müəllimin diqqətini şəkəcək. Çünki bu baş verməzsə, Fərahim Mirzəyevin narazılıq doğuran davranışları və qanunsuz tələbləri günlərin birində hüquq-mühafizə orqanlarının diqqətini çəkəcək” – deyə Əmlak Komitəsinə müraciət etmş vətəndaşlardan biri bildirib.
Növbəti yazımızda Fərahim Mirzəyevin dəbdəbəli həyatından və sahib olduğu mülklərdən bəhs edəcəyik.
Missiya.Az
