XalqXəbər.Az

www.XALQXEBER.az » Bölgə » Goranboy İcra Hakmiyyətindən bağçalara qarşı mazoxizm - Fotolar

Goranboy İcra Hakmiyyətindən bağçalara qarşı mazoxizm - Fotolar

Goranboy İcra Hakmiyyətindən bağçalara qarşı mazoxizm - Fotolar
12-05-2020, 14:13

Növbədənkənar parlament seçkilərində 96 saylı Goranboy-Naftalan Seçki Dairəsindən deputatlığa namizəd olan jurnalist Rufik İsmayılov “Facebook” profilində Goranboy rayonunun 4 kəndindəki uşaq bağçasının acınacaqlı vəziyyətinə dair məlumat və fotolar paylaşıb...
Jurnalist “27 dekabr 2011-ci il tarixdə Prezident İlham Əliyev tərəfindən “Azərbaycanda körpələr evlərinin, körpələr evi-uşaq bağçalarının, uşaq bağçalarının, xüsusi uşaq bağçalarının və uşaq evlərinin inkişafı ilə bağlı tədbirlər barədə” Sərəncam imzaladığını xatırladaraq Təhsil Nazirliyinin tabeliyində olan körpələr evləri, körpələr evi-uşaq bağçaları, uşaq bağçaları, xüsusi uşaq bağçaları və uşaq evlərinin yerli icra hakimiyyəti orqanlarının (Bakı şəhəri üzrə Bakı Şəhər İcra Hakimiyyətinin, Gəncə şəhəri üzrə Gəncə Şəhər İcra Hakimiyyətinin) tabeliyinə verildiyini qeyd edir.

Belə bir qərarın qəbul edilməsində başlıca məqsəd ölkədəki körpələr evlərinin, körpələr evi-uşaq bağçalarının, uşaq bağçalarının, xüsusi uşaq bağçalarının və uşaq evlərinin fəaliyyətinin müasir tələblər səviyyəsində qurulmasını, uşaqların intellektual, fiziki və psixoloji inkişafı üçün lazımi şəraitin yaradılmasını təmin etmək olub.

Jurnalist iddia edir ki, Prezident İlham Əliyevin bu Sərəncamından irəli gələn tapşırıq və vəzifələrin Goranboy rayonunun 4 kəndindəki uşaq bağçasına pay düşməyib. Hansıki, həmin bağçaların vəziyyəti uzun illərdir ürəkaçan deyil və bunu rayonda yaşayan hər kəs bilir:

“Xatırladım ki, Goranboy rayonu ərazisində ümumilikdə 32 körpələr evi-uşaq bağçası fəaliyyət göstərir. Bu məktəbəqədər təhsil müəssisələrindən biri 3500-dən artıq sakinin yaşadığı Qaradağlı kəndindəki 90 yerlik Körpələr Evi - Uşaq Bağçasıdır. Kəndin düz girəcəyində yerləşən və 1985-ci ildə istifadəyə verilən uşaq bağçasında indiyə kimi əsaslı təmir işi aparılmayıb. Nəticədə iki mərtəbəli inzibati bina tamamilə yararsız hala düşüb. 1993-cü ildə Kəlbəcər rayonu Ermənistan silahlı qüvvəələri tərəfindən işğal olunduqdan sonra 10-a yaxın məcburi köçkün ailəsi bağça binasının bir hissəsində məskunlaşdırılıb. 2012-ci ildə bu ailələr yeni mənzillərlə təmin olunaraq bağça binasından köçürülüblər. 2013-cü ilin may ayında təhsil müəssisəsinin əsaslı təmir olunacağı xəbəri yayılsa da icra hakimiyyəti tərəfindən aparılan “təmir işləri” binanın mərkəzi yola tərəf olan hissəsində fasadın boyanması ilə yekunlaşıb. Binanın görünməyən hissəsi, yəni arxa tərəfi isə olduğu kimi saxlanılıb. Necə deyərlər, üzü bəzək, içi təzək. Kənd çoxdan qazlaşdırılsa da uşaq bağçası qış aylarında odun sobası hesabına qızdırılır.

Goranboy rayonunun Veyisli kəndindəki Körpələr Evi-Uşaq Bağçası da uçuq-sökük, Nuh əyyamından qalma, odun sobası hesabına “qızdırılan” taxta tikilidən ibarətdir. Belə bir təhsil müəssisəsində normal səviyyədə məktəbəqədər təlim-tərbiyədən söhbət gedə bilməz. Kənd sakinləri ümid edirlər ki, nə vaxtsa bu kənddə müasir uşaq bağçası tikiləcək. Köhnə taxta tikili bərbad vəziyyətdə olmaqla yanaşı, həm uşaqların, həm də orada çalışanların həyatını təhlükəyə atır. Belə ki, hansısa səbəbdən o köhnə taxta tikilidə yanğın baş versə bağçanın qısa zamanda tamamilə alışıb yanması, faciə qaçılmazdır.
Bir zamanlar rayonun ən böyük çörək zavodunun, hamamının, iki xəstəxanasının yerləşdiyi, ərazisi neft yataqları və müalicəvi sularla zəngin Qazanbulaq şəhər tipli qəsəbəsindəki Körpələr Evi-Uşaq Bağçası da Veyisli kəndindəki məktəbəqədər tərbiyə müəssisəsinin bir növ eynisidir. Yuxarıda bəhs etdiyim acınacaqlı durum bu bağça binasında da özünü göstərir.
Rayonun Nərimanlı kəndində isə bineyi-qədimdən uşaq bağçası olmayıb. Lakin zaman keçdikcə buna ehtiyac duyulduğundan köhnə məktəb binası uşaq bağçası kimi istifadə olunub. 1950-60-cı illərdə çiy kərpicdən tikilmiş, qəzalı vəziyyətdə olan binada balacaların təlim-tərbiyəsi ilə məşğul olublar. Amma yağan yağışlar bu binanın divarlarını yuyub aparıb, divarın bir hissəsi uçub sökülüb. İndi kəndin balaca sakinləri ümumiyyətlə ilkin təhsildən kənarda qalıblar”.

Təqdim edilən fotolara əlavə şərh verib yerli icra orqanının, o cümlədən uşaq bağçalarının bu vəziyyətinə görə konkret cavabdeh olan şəxslərin ünvanına nə isə söyləməyə ehtiyac duymuram. Çünki, görünən kəndlərə bələdçi lazım deyil”.

Ölkə başçısı 22 dekabr 2008-ci il tarixdə “2009-cu ilin “Uşaq ili” elan edilməsi haqqında” Sərəncam imzalayıb. 2020-ci ildir, 12 il keçib, ancaq Goranboy İcra Hakmiyyəti hələ də bu Sərəncamın mahiyyətini anlamayıb.(rupor)
Goranboy İcra Hakmiyyətindən bağçalara qarşı mazoxizm - Fotolar








XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.