SON DƏQİQƏ
XalqXeber.Az » Siyasət » "Bu istiqamətdə yeganə çətinlik odur ki, zaman kəsimi dardır" - Seçki-2018

"Bu istiqamətdə yeganə çətinlik odur ki, zaman kəsimi dardır" - Seçki-2018

Tarix:

1-03-2018, 09:55

/ 1 254 dəfə oxundu.
"Bu istiqamətdə yeganə çətinlik odur ki, zaman kəsimi dardır" - Seçki-2018

11 apreldə keçiriləcək növbədənkənar prezident seçkisində iştirak etmək üçün namizədliyi irəli sürülmüş şəxslərin qeydə alınmasına görə lazım olan seçici imzalarının və digər seçki sənədlərinin MSK-ya təqdim edilməsinə ayrılan müddət martın 12-də başa çatacaq. MSK indiyədək 15 nəfərin prezidentliyə namizədliyinin irəli sürüldüyünü təsdiqləyib və onlara imza vərəqələri verilib. Həmin şəxslərdən 40 mindən yuxarı imzanı ən tez toplayan hakim Yeni Azərbaycan Partiyası oldu. YAP-ın namizədi MSK tərəfindən fevralın 27-də rəsmən qeydə alınıb. İddiaçılar sırasında daha biri-namizədliyini müstəqil qaydada irəli sürən deputat Zahid Oruc fevralın 28-də imzatoplama kampaniyasını yekunlaşdırıb və imzaları, digər sənədləri MSK-ya təqdim edilib.

Zahid Orucun Seçki Qərargahından “Yeni Müsavat”a verilən xəbərə görə, millət vəkili kimi fəaliyyət göstərdiyi dövrdə Zahid Oruca yaxın olan insanlar, eyni zamanda onun daşıdığı siyasi kursa sadiq adamlar və könüllü şəxslər hesabına 67 dairədən 44624 imza toplanıb, digər sənədlər, yəni gəlir və əmlak deklarasiyası ilə birgə MSK-ya təqdim olunub.

Seçki Qərargahından həmçinin bildiriblər ki, imzalara 5 gün ərzində rəsmi qiymət veriləcək.

Digər iddiaçılar isə hələ ki imzatoplama kampaniyasını davam etdirirlər. AĞ Partiyanın sədri Tural Abbaslının namizədliyi üçün imzatoplama kampaniyası davam edir. T.Abbaslının verdiyi məlumata görə, illərdir seçkilərin nəticələrinin heç nəyi dəyişmədiyini düşünən insanlar təbii ki, bu prosesə çox maraqsız yanaşırlar: “Bir çox vətəndaşlarımız isə ümumiyyətlə, seçkilərə inanmadıqları üçün heç imza belə vermək istəmirlər. Bu da təbii olaraq bizim işimizi daha da çətinləşdirir.

Hələ nəzərə alsaq ki, bu günə qədər seçkilərdə müxtəlif fikirlərə sahib seçicilərə yerli hakimiyyət orqanları tərəfindən bu və ya digər formada təzyiqlər olunub və bunun nəticəsi kimi də bu gün seçicilər özlərini qorumaq üçün imza belə verməkdən çəkinirlər, o zaman işlərin nə qədər əziyyətli olduğunu təsəvvür etmək olar.

Ancaq biz nikbinik. Mən əminəm ki, biz AĞ Partiya olaraq qanunla nəzərdə tutulmuş müddətdə lazımi sayda imzanı toplayıb MSK-ya təhvil verəcəyik. Artıq ondan sonrakı mərhələ bizdən asılı deyil, təəssüf ki. Hər halda, bu mərhələdə bizim kimi yeni partiyanın iştirakını artıq uğur saymaq olar".

Vətəndaş və İnkişaf Partiyasının namizədi Əli Əliyev bildirdi ki, imzatoplama kampaniyası rayonlarda və Bakı ətrafında davam edir: “Düzdür, hazırda yekun haqqında danışmaq olmaz. Proses ayın 25-dən başlayıb. Yəqin ki, bu həftə müəyyən mənzərə olacaq. İmzalar toplandıqca Mərkəzi Qərargaha çatdırılmasına çalışırıq. Digər tərəfdən, hələ yerlərdən məlumat almamışıq. Bu istiqamətdə yeganə çətinlik odur ki, zaman kəsimi dardır”.

ADP-nin namizədi Sərdar Cəlaloğlu isə imzatoplama kampaniyasını cəmi dörd gündür başlayıb: “Bildiyiniz kimi, bir neçə gün bundan öncə sənədlərimi MSK-ya təqdim etdim. Bu baxımdan imzatoplama kampaniyasına az müddətdir başlamışıq. Hələ də kampaniya davam edir. Lakin 40 min imzanı toplamaq həddindən artıq çətindir. Keçən seçkilərə də bilirsiniz, gec qatılmışdıq. Sadəcə, imzatoplama kampaniyasına çox adam cəlb edə bilsək, demək olar ki, çətin olmaz. Haradasa 200 nəfərin bu kampaniyada iştirakını təmin etsək, imzaları təxminən 2-3 günə toplamaq mümkündür. Sadəcə, problem daha çox adamın prosesə cəlb edilməsidir”.

BAXCP-nin namizədi Qüdrət Həsənquliyev üçün imzatoplama kampaniyası da sona yaxınlaşmaqdadır. Bu barədə namizədin seçki qərargahından məlumat verilib.

Azərbaycan Liberal Demokrat Partiyasının namizədi Fuad Əliyev isə bildirib ki, 20 mindən yuxarı imza toplanıb, proses davam edir.

Milli Dirçəliş Hərəkatı Partiyasının namizədi Fərəc Quliyev indiyədək topladıqları imzaların 25 minə çatdığını deyib. Kampaniya davam etdirilir.

Müasir Müsavat Partiyasının namizədi Hafiz Hacıyev isə imzatoplama kampaniyasını yekunlaşdırmaq üzrə olduqlarını bildirib.

Cəbhəçilər təşəbbüs qrupunun namizədi Razi Nurullayev məlumat verdi ki, imzatoplama kampaniyası rahat gedir, lakin xalqın imza verməyə növbəyə dayandığını da demək olmaz: “Xalqda inamsızlığın da, stressin də, sevincin də, kədərin də, hətta qorxunun da olduğunu görürük. Əlimizdən gələni edirik ki, imzaları tez bir zamanda toplaya bilək. Daha çox könüllü cəlb etmək üçün çox çalışdıq və məncə, Azərbaycanın siyasi reallığı üçün kifayət qədər də uğurlu seçki qərargahı qura bildik”.

“Bəzi müxalifətçilər qeydiyyata alınacağı halda bütün müxalifətin Sərdar Cəlaloğlunu dəstəkləməsinin məqsədəuyğun olduğunu bəyan etməkdədirlər. Sizdən hansısa mərhələdə belə bir addım gölzənilirmi? Yoxsa Sərdar Cəlaloğlunun və digər müxalifətçilərin Sizi dəstəkləməsini daha məqbul sayırsınız?” suallarına Razi Nurullayev belə cavab verdi: “Bizim müxalifətçilikdə öz davamlı yolumuz var. Ənənəvi müxalifətin 30 illik siyasi mübarizəsi uğursuzluğa düçar olub. Onların siyasi taktika və strategiyaları işləməyib. Biz indi fərqli yol seçmişik. Bu yol ən azından Türkiyə siyasi modelinin oturuşmasına çalışmaq və nail olmaqdır. Siyasətçilər bir-birinə qan düşməni kimi yox, rəqib kimi baxsınlar. Qalib gəldiyimiz halda, cəmiyyətdə bunu tətbiq edəcəyik. Qalib olmasaq belə, siyasi ab-havanı dəyişə biləcəyik və xalqa daha çox xeyrimiz dəyəcək. Xalq görəcək ki, bizim apardığımız siyasət nəticəsində onun səsi daha yaxşı eşidilir və onun ehtiyaclarına daha önəmlə yanaşılır.

Bütün namizədlərə, biz də içində olmaqla uğurlar diləyirəm. Siyasi partiyaların kimi müdafiə edib-etməməsi öz işləridir. Mən əvvəlki illər ərzində çox çalışmışam, hətta hər bir partiya sədrinə məktub da göndərmişəm ki, seçkiyə hazırlaşaq və bir namizəd də müəyyən edək. Cavab olmayıb, hərəkətlilik olmayıb. İndi seçki mərhələsində belə şeyləri müzakirə etmək məsuliyyətsizlikdir. Biz indi imzatoplama mərhələsindəyik və inşallah, seçki davranışımızı da MSK-nın verəcəyi qərardan sonra açıqlayacağıq. Bu məsələdə özünü təkzib də var. Necə yəni seçkini boykot edirəm, amma filan namizədi dəstəkləyirəm. Özlərini gülünc günə qoymasınlar. Sərdar Cəlaloğlu gözəl insandır, dəyərli siyasətçidir, uğurları bol olsun. Ağıllı adamlarıq və bir-birimizə də hörmətimiz var, özümüz də nəyin məqbul olub-olmamasını müzakirə də bilərik".

Bu arada Azərbaycanda vahid seçici siyahısı açıqlanıb. MSK-nın sədr müavini Natiq Məmmədov bildirib ki, Azərbaycanda səsvermə hüququ olan 5 milyon 192 min 42 şəxs var.

Onun sözlərinə görə, 2018-ci il üzrə daimi seçici siyahılarının dəqiqləşdirilməsi, tərtib edilməsi, təsdiq edilməsi və ictimailəşdirilməsinin cari il martın 3-nə qədər başa çatdırılması qərara alınıb.

Şərhlər

XƏBƏR LENTİ