Bakının mərkəzində aksiya keçirənlər ölkədəki mövcud ictimai-siyasi sabitliyə xələl gətirmək istəyirlər.
Azərbaycan hüquqi dövlətdir və ölkədə belə icazəsiz aksiyaların keçirilməsi yalnız şou yaratmağa xidmət edir. Onlar bu cür addımları xaricdən, xüsusilə də erməni lobbisindən aldıqları təlimatlara əsasən atırlar.
Düşünürəm ki, qanun pozuntularına görə cərimələrin artırılması üçün də kifayət qədər əsas və fakt var.
Bunu Xalqxeber.az-a açıqlamasında Hüquq Eksperti İsmayıl Zalov həbsdə olan sabiq icra başçısı Saleh Rüstəmliyə azadlıq tələbi ilə keçirilən aksiya barədə danışarkən deyib.
Bu yaxınlarda Saleh Rüstəmli ilə bağlı bir qrup şəxs Fəvvarələr Meydanında qanunsuz aksiya keçirdi. Həmin aksiyada hamısı xüsusi hazırlıq keçmiş müxalifət düşərgəsində təmsil olunan insanlar idi. Artıq bunlar etiraz aksiyası adı altında təxribatla məşğul olmaq, dağıdıcı qüvvələrin tapşırıqlarını yerinə yetirmək üçün hərəkət edirlər. Bundan sonra bütün bu məsələlər qanunla tənzimlənəcək və hamı qanun qarşısında cavab verəcək.
Ümumiyyətlə, Azərbaycanda etiraz aksiyası keçirilmir. Bir qrup adamdır, düşüblər ortaya. Onların sosial bazası olmadığına görə şəhərin mərkəzi hissələrində aksiya keçirməyə, Fəvvarələr meydanına, Sahil bağına toplaşmağa çalışırlar. Oradan keçən insanların sayı hesabına guya izdihamlı mitinq keçirdiklərini göstərməyə, müxtəlif şəkillər çəkib beynəlxalq təşkilatlara, onları himayə edən qurumlara göndərib qrant almağa çalışırlar.
