Samux rayon Lək kənd sakini Hüseynzadə Ənvər Mehman oğlu bir neçə medya qurumlarına video-müraciət göndərərək hazırkı durumu barədə açıqlama verib.
Mən Hüseynzadə Ənvər Mehman oğlu Samux rayon Lək kənd sakiniyəm və hazırda da həmin ərazidə yaşayıram. 44 günlük Qarabağ müharibəsinin iştirakçısı olmuşam və döyüşlərdə fəal iştirak etmişəm. Hazırda işsizəm. Hara müraciət edirəmsə aldadıcı vədlərlə məni geri qaytarırlar.
Məşğulluq mərkəzinə müraciət etmişəm, adımı yazıb dedilər ki, get çağıracağıq. Ancaq bu günə kimi heç bir xəbər yoxdur.
Şikayətimizə baxan yoxdur. Ailəliyəm və himayəmdə körpə övladım var. Hazırda mən ailə-uşağıma baxa bilmirəm. Uşağa yeməyini belə ala bilmirəm.
Hökumət adamı yaşamağa belə peşman edir. Belə vəziyyət bu gün Azərbaycan dövlətinə ancaq utanc gətirən haldır.
Neft-qaz ölkəsinin vətəndaşları acından ölür, quru çörəyə möhtacdır.
Heç bir yerdə iş yeri yoxdur.
Azərbaycan dövlətindən, rəsmi qurumlardan kömək istəyirəm. Məni bir işlə təmin edin ki, ailə-uşağıma baxa bilim.
Redaksiyadan: Məsələ ilə bağlı rəsmi qurumların da mövqeyini dərc etməyə hazırıq. //azinfo.tv//