SON DƏQİQƏ
XalqXeber.Az » Aktual » Prezidentin məsələyə qarışması "Azeravtoyol"u qorxuya saldı: Özləri özlərini təkzib etdilər - FOTOFAKT

Prezidentin məsələyə qarışması "Azeravtoyol"u qorxuya saldı: Özləri özlərini təkzib etdilər - FOTOFAKT

Tarix:

1-03-2017, 16:42

/ 1 774 dəfə oxundu.
Prezidentin məsələyə qarışması "Azeravtoyol"u qorxuya saldı: Özləri özlərini təkzib etdilər - FOTOFAKT

Xəbər verdiyimiz kimi, Azərbaycan Prezidenti İlham Əliyev Azərbaycan ədəbiyyatının parlaq nümayəndələrindən olan Mikayıl Müşfiqin abidəsinin sökülməsindən ciddi narahat olub. Dövlətimizin başçısı məsələnin hərtərəfli araşdırılması və günahkarların cəzalandırılması ilə bağlı aidiyyəti orqanlara tapşırıq verib.

Bu sözləri Azərbaycan Respublikası Prezidentinin İctimai-siyasi məsələlər üzrə köməkçisi Əli Həsənov deyib. Əli Həsənov bildirib ki, cənab İlham Əliyevin prezidentliyi dövründə onlarla tarixi və mədəniyyət abidəsi əsaslı şəkildə bərpa olunub, Azərbaycanın Qara Qarayev, Fikrət Əmirov, Niyazi, Bülbül, Rəşid Behbudov və digər tanınmış şəxsiyyətlərinə abidələr ucaldılıb. Cənab Prezident tarixi əhəmiyyət kəsb edən tikililərin, mədəniyyət abidələrinin qanunvericiliyə uyğun şəkildə aidiyyəti dövlət orqanları ilə razılaşdırmadan, icazəsiz sökülməsini yolverilməz hesab edir və bundan sonra da belə əməlləri törədənlər ciddi şəkildə cəzalanacaqlar.

Məlumata görə, Prezidentin bu məsələyə münasibət bildirməsindən sonra "Azeravtoyol" təcili açıqlama yayıb və qeyd olunub ki, 3 əməkdaş işdən çıxarılıb:
Bakı şəhərinin Yasamal rayonu ərazisində Füzuli meydanının ətrafındakı yol-nəqliyyat infrastrukturunun yaxşılaşdırılması və abadlıq işlərinin aparılması, həmçinin Təzəpir məscidi kompleksinin ətraf ərazisinin abadlaşdırılması ilə əlaqədar tədbirlər haqqında Azərbaycan prezidentinin sərəncamlarına uyğun olaraq hazırlanan layihələr əsasında İnşaatçılar və Nərimanov prospektlərinin kəsişməsində (Statistika dairəsi) aparılan yenidənqurma işləri zamanı 8 N-li Xüsusi Təyinatlı Yol İstismarı MMC-nin iş icraşısı "Azəravtoyol” ASC-nin rəhbərliyinə və çalışdığı MMC-nin direktoruna məlumat vermədən görkəmli şair Mikayıl Müşfiqin ərazidə yerləşən büstünü çıxarıb. Bununla da öz üzərinə düşən əmək funksiyasını lazımi qaydada yerinə yetirməyərək kobud şəkildə qanun pozuntusuna yol verdiyinə görə MMC-nin iş icraçısı Rəhimov Ramiz Tapdıq oğlu tutduğu vəzifədən azad edilərək işdən çıxarılıb.

Bu barədə "Azəravtoyol” ASC-nin Mətbuat Katibliyinin rəisi Anar Nəcəfli bildirib. Onun sözlərinə görə, həmçinin müəyyən edilib ki, 8 N-li Xüsusi Təyinatlı Yol İstismarı MMC-nin baş mühəndisi və direktoru üzərlərinə düşən vəzifələrini yerinə yetirməyərək layihədə nəzərdə tutulan işlərə nəzarəti lazımi qaydada həyata keçirməyiblər: "Bu səbəbdən MMC-nin direktoru Şirinov Əliheybət Balakişi oğluna xəbərdarlıq edilib, MMC-nin baş mühəndisi Hüseynov Yuris Xələf oğluna isə töhmət verilib”. "Azəravtoyol” ASC görkəmli şair Mikayıl Müşfiqin büstünün çıxarılması ilə bağlı vaxtında ictimaiyyətə və KİV-ə məlumat verilməməsi nəticəsində yaranan haqlı narahatlığa görə üzr istəyir.

Maraqlıdır ki, "Azeravtoyol" Prezidentin məsələyə qarışmadığı müddətdə geri addım atmamış və cəmiyyətin əməkdaşları açıqlamalarında özlərini haqlı çıxarmışdılar. Bu məsələylə bağlı daha bir açıqlamanı isə Mədəniyyət və Turizm Nazirliyi edib və onlar da büstün götürülməsinə, eyni zamanda ağacların kəsilməsinə görə "Azeravtoyol"u suçlayıb:

Bakının İnşaatçılar prospektindəki Mikayıl Müsfiq parkında gecə saatlarında qanunsuz olaraq ağacların kəsilməsi ilə bağlı daxil olan məlumat Ekologiya və Təbii Sərvətlər Nazirliyinin (ETSN) Ətraf Mühitin Mühafizəsi Departamentinin əməkdaşları tərəfindən yerində araşdırılıb. Bu barədə ETSN-in mətbuat xidmətinin rəhbəri İradə İbrahimova bildirib.

Onun sözlərinə görə, araşdırma zamanı sözügedən ərazidə "Azəravtoyol" ASC-nin işçiləri tərəfindən 27 ədəd müxtəlif cinsli və müxtəlif diametrli bioloji inkişafda olan ağacın kəsilərək məhv edildiyi müəyyən olunub. Hazırda nazirliyin əməkdaşları tərəfindən "Yaşıllıqların mühafizəsi haqqında" qanunun tələblərinin pozulması faktı ilə əlaqədar dəymiş ziyanın ödətdirilməsi və təqsirkar şəxslərin məsuliyyətə cəlb edilməsi məqsədilə inzibati araşdırmalar aparılır. Qeyd edək ki, mövcud qanunvericiliyə uyğun olaraq hüquqi şəxslər barəsində inzibati işlərə baxmaq səlahiyyəti məhkəmə orqanlarında olduğundan, ETSN tərəfindən fakt üzrə toplanan materiallar tədbir görülməsi üçün məhkəməyə göndəriləcək.

Görünən odur ki, "Azeravtoyol" təkcə dahi şairimiz Mikayıl Müşfiqin büstünü yoxa çıxarmayıb, eyni zamanda ağacları da məhv edib.

Son olaraq səhmdar cəmiyyətin rəsmi "facebook" səhifəsində bir-birini təkzib edən 2 açıqlamanı təqdim edirik.

Məsələnin ən maraqlı yanı isə odur ki, bu məsələyə Cənab Prezident müdaxilə etməsəydi, "Azəravtoyol" rəhbərliyi inadlarından dönməyəcəkdilər və özlərinə haqq qazandırmağa davam edəcəkdilər.

Prezidentin məsələyə qarışması "Azeravtoyol"u qorxuya saldı: Özləri özlərini təkzib etdilər - FOTOFAKT
Prezidentin məsələyə qarışması "Azeravtoyol"u qorxuya saldı: Özləri özlərini təkzib etdilər - FOTOFAKT

Şərhlər

XƏBƏR LENTİ