Bu gün 45 saylı Abşeron seçki dairəsi dairə seçki komissiyasının sədri Dilşad Abbasovanın doğum günüdür. Dilşad xanımın 70 yaşı tamam olur. Bu münasibətlə Abşeron Rayon İcra Hakimiyyətinin əməkdaşları yubilyarın evində olub, Abşeron RİH başçısı İradə Gülməmmədovanın adından yubilyara təbrik məktubu və qiymətli hədiyyə təqdim ediblər.

Məlumat üçün bildirək ki, Dilşad Salman qızı Abbasova 1950-ci il iyul ayının 30-da Naxçıvan Muxtar Respublikasının Ordubad rayonunda ziyalı ailəsində anadan olub. 1956-cı ildə Ordubad rayonunun S.Vurğun adına 1 nömrəli orta məktəbinə qəbul edilib, 1967-ci ildə bitiririb. 1967-1971-ci illərdə M.A.Əliyev adına Azərbaycan Dövlət İncəsənət İnstitutunun (hazırda ADMİU) “Mədəni-maarif işi” ixtisasını fərqlənmə diplomu ilə bitirib.

D.Abbasova ilk əmək fəaliyyətinə 1972-ci ilin iyul ayının 21-də Mədəniyyət Nazirliyinin təyinatı ilə Abşeron Rayon Mədəniyyət şöbəsində başlayıb. Həmin ildən 1983-cü ilə qədər Abşeron Rayon Mədəniyyət şöbəsində müdir və müxtəlif vəzifələrdə çalışıb. 1983-cu ilin fevral ayından Abşeron Rayon Xalq Deputatları Soveti İcraiyyə Komitəsində sədr müavini, həmin ilin noyabr ayından 1991-ci ilə qədər isə rayon partiya komitəsində fəaliyyətini davam etdirib.Oxumaq, öyrənmək daim bu barədə irəliyə getmək həvəsi Dilşad Abbasovanı 1991-ci ildə Bakı Ali Partiya Məktəbinə (indiki Dövlət Idarəçilik Akademiyasına) gətirib çıxardır. D.Abbasova 1991-1996-cı illərdə Abşeron rayonunda Məişət Xidməti Kombinatının direktoru vəzifəsində işləyib, 1996-cı ildən 2005-ci ilə qədər isə fərdi sahibkarlıqla məşğul olub. Dilşad Abbasova 2006-cı ilin sentyabr ayının 12-dən bu günə kimi 45 saylı Abşeron seçki dairəsi dairə seçki komissiyasının sədri vəzifəsində çalışır.

İşlədiyi müddətdə dəfələrlə Abşeron rayon İcra Hakimiyyəti tərəfindən fəxri fərman və diplomlarla , 2006-ci ildə ölkə başçısı tərəfindən “Tərəqqi” medalı, 2019-cu ildə “Azərbaycan Xalq Cümhuriyyətinin 100 illiyi yubiley medalı” ilə təltif edilib.

Ailəlidir. 2 övladı və 4 nəvəsi var.

Həyat yoldaşı Əməkdar incəsənət xadimi Çingiz Qurban oğlu Abbasovdur. Ç.Abbasov AZTV-nin Musiqi Verilişləri Redaksiyasında Xalq Musiqisi şöbəsinin böyük redaktorudur. Neçə-neçə sənətçinin yaradıcılıq yolunun araşdırılmasına böyük zəhmət sərf edib, Azərbaycan Televiziyasının “Qızıl Fond”unun zənginləşməsinə töhfəsini verib. Xalq musiqisi və muğamların təbliğindəki xidmətlərinə görə, “Min bir mahnı” mükafatına layiq görülüb. Azərbaycan televiziyasının və radiosunun inkişafındakı xidmətlərinə görə, Prezident İlham Əliyevin sərəncamı ilə “Tərəqqi” medalı ilə təltif edilib.