Bu gündən etibarən “Azərbaycan Hava Yolları” Bakı-Naxçıvan-Bakı istiqamətində daxili reyslərin yerinə yetirilməsinə başlayır.

AZAL-dan "BakuPost"a verilən məlumata görə, Naxçıvan istiqamətində reyslərə yalnız COVID-19 üçün müayinədən keçərək neqativ nəticə alan sərnişinlər buraxılacaq.
İki reys həyata keçiriləcək – Bakıdan uçuş saat 12:00 və 15:00-da, Naxçıvandan uçuş isə saat 14:10 və 17:00-da baş tutacaq.
Bakı-Naxçıvan-Bakı marşrutu üzrə reyslər həftədə iki dəfə - ikinci və dördüncü günlər “Embraer E-190” hava gəmilərində yerinə yetiriləcək.

Qeyd edilməlidir ki, sayt vasitəsilə aviabiletlər sərnişinə məxsus olan kredit kartı ilə alınmalıdır və reysə qeydiyyat zamanı yoxlanılacaq. Kredit kartının sahibi sərnişinlər qrupunun tərkibinə daxil olduğu təqdirdə bir kredit kartı ilə bir neçə aviabilet alına bilər.

Müvafiq reysə aviabiletlərin satışı uçuşdan 72 saat əvvəl bağlanacaq. Daxili reyslərdə sərnişinlərin qeydiyyatı uçuşdan 3 saat əvvəl başlayır.
TƏBİB laboratoriyasında müayinə üçün qeydiyyatdan keçmək məqsədilə, aviabilet aldıqdan sonra sərnişinə https://randevu.its.gov.az/ saytına daxil olaraq aviabiletin nömrəsini qeyd etmək təklif olunacaq. Sistem vasitəsilə avtomatik qaydada müayinə tarixi və Bakı yaxud Naxçıvan ərazisində tövsiyə olunan laboratoriyanın ünvanı təyin ediləcək.

Reysin uçuşundan ən gec 48 saat əvvəl və ən tez 72 saat əvvəl COVID-19 üçün müayinədən keçmək lazımdır. Sərnişin müayinədən keçməkdən imtina etdikdə, habelə müayinənin nəticələri müsbət olduqda reysə buraxılmayacaq, aviabilet üçün ödənilmiş məbləğ isə geri qaytarılacaq.

Qeyd etməliyik ki, Bakı-Naxçıvan-Bakı marşrutu üzrə reyslərin daha tez-tez yerinə yetirilməsinə ölkədə epidemioloji vəziyyətdən asılı olaraq Nazirlər Kabineti yanında Operativ Qərargahın qərarı ilə icazə verilməlidir.