Ölkəmizdə reklam sektorunun nə qədər acınacaqlı olduğu barədə çox deyilib, çox yazılıb. Əhalisi Azərbaycandan xeyli az olan ölkələrdə bu sahədə böyük işlər görülür. Ölkəmiz isə nəinki Avropa ölkələri, hətta Gürcüstan və Ermənistandan belə adambaşına reklam xərcləri mövzusunda geri qalır.

Telekanalların, radioların, saytların, mətbuat orqanlarının əsas gəlir mənbəyi reklamdır. Azərbaycanda isə kütləvi informasiya vasitələrindəki acınacaqlı durumu isə hamı bilir. Keyfiyyətli kontent üçün əhali rus, türk, ingilis dilində olan KİV-lərə müraciət edir.

Sual yaranır ki, niyə ölkədə reklam sektoru belə pis vəziyyətdədir? Niyə peşəkarlar xaricə qaçır, niyə televiziya verilişlərində aşağı keyfiyyətli məzmun göstərilir, niyə reklam büdcələri düzgün şəkildə xərclənmir?

Qəribə olsa da, siyasi məsələlərin də bu sahəyə böyük təsiri var. Onsuz da kasıb olan reklam bazarının sirləri getdikcə açılmağa başlayır.

Prezident Administrasiyasının ictimai-siyasi məsələlər şöbəsinin 14 il müdiri olmuş Əli Həsənov barədə qalmaqallı məlumatlar son zamanlar hamının diqqət mərkəzindədir. Oğlu Şamxalı Xəzər Media qrupunun sahibi etdirmiş Əli Həsənovun özünün də, oğlunun da Fətullah Gülən ilə əlaqəsinə aid məlumatlar cəmiyyətdə əks-səda doğurdu.

Araşdırmalardan məlum olur ki, əvvəllər Samanyolu TV, sonradan isə adını dəyişib Xəzər TV qoymuş kanalın direktoru Hüseyn Dinləməz idi. O, öz vəzifəsini Şamxala birbaşa olaraq Amerikadan maliyyələşən Fətullah Güvən qruplaşmasının tapşırığı ilə verir.

Xəzər TV-nin vitse-prezidenti və reklam müdiri vəzifəsinə isə Gökhan Özkundakçı təyin olunur. Bu Gökhan da sən demə Fətullah Gülənin Samanyolu TV-sinin reklam koordinatoru Mehmet Özkundakçının qardaşıdır. Bir az da dərinə getsək, Mehmet Özkundakçının özü də Samanyolu TV-sinin FETO işindən ötrü 31 illik cəza almış müdiri Hidayət Karacanın bacanağıdır.

Onlar da öz növbəsində Amerikada yaşayan Faruk Tabana bağlıdır ki, o da Fətullah Güvənin sağ əli sayılır.

Yeri gəlmişkən, yuxarıda adını çəkdiyimiz Mehmet Özkundakçı Türkiyədə reklam sferasında tanınmış adamdır, "Medya Planlama", "Üçü Bir Arada", "Reklamcılığa Giriş" kimi kitabların müəllifidir. Türkiyədəki şirkətləri Azərbaycanda reklam verəndə təbii ki, məhz tanıdığı, öz şəbəkələrinə aid şirkətlərlə yaxın olmağa dəvət edib.
Beləliklə, o şirkətləri yönləndirir ki, reklamlarını Azərbaycanda məhz HAVAS Azerbaijan agentliyi (keçmiş adı MPG) və onun direktoru olan Zaur İsmayılov vasitəsilə yerləşdirsinlər. Təəccüblü deyil ki, Türkiyənin ən böyük istehsalçılarından biri olan Hayat Group ("Molfix" qadın gigiyenik vasitələri, "Molped" uşaq bezləri, "Papia" salfetləri, "Bingo" yuyucu vasitəsi və s. istehsal edir) və Şölen ("Ozmo", "Biscolata" şokoladları və s. istehsal edir) şirkətləri reklamlarını məhz Havas Azerbaijan vasitəsilə yerləşdirir.
Cümə namazına bir yerdə gedən Gökhan Özkundakçı və Zaur İsmayılovun dostluğu da yalnız "din qardaşlığından" irəli gəlmir, onun arxasında həm də biznes maraqları durur.
Gördüyünüz kimi, FETO şəbəkəsi çox sıx işləyir. Azərbaycandan Türkiyəyə, Türkiyədən Azərbaycanda gedən pul axınına mümkün qədər çox nəzarət edirlər.
Bu yaxında KİV-də yayılmış Xəzər TV-nin reklam gəlirlərini göstərən faktlardan da görünür ki, gəlirlərin böyük bir hissəsi nağd şəkildə olub. Şübhəsiz ki, vergidən yayınmaqla kanala ödənilmiş bu pulların əksəriyyəti qeydiyyata alınmır və gizlin məqsədlər üçün istifadə olunurmuş:

Görünən odur ki, Azərbaycanda Fetullah Gülen qruplaşmasının yalnız energetika, elm, nəqliyyat sahəsində deyil, reklam sahəsində də böyük şəbəkəsi varmış. Havas Media-nın direktoru Zaur İsmayılov, Xəzər Media qrupunda çalışan bəzi yüksək vəzifəli şəxslər və s. – qısa desək, FETO qruplaşmasının əməllərinin nəticəsidir ki, ölkədə reklam sahəsində qeyri-şəffaf və ədalətsiz vəziyyət yaranıb.

Anews.az