SON DƏQİQƏ
XalqXeber.Az » Cəmiyyət » “ÇOVDAROV BƏLASINDAN QURTARDIQ, AMMA…” – Həbsdəki iş adamının ailəsi Prezidentdən imdad diləyir

“ÇOVDAROV BƏLASINDAN QURTARDIQ, AMMA…” – Həbsdəki iş adamının ailəsi Prezidentdən imdad diləyir

Tarix:

2-02-2017, 10:31

/ 2 201 dəfə oxundu.
“ÇOVDAROV BƏLASINDAN QURTARDIQ, AMMA…” – Həbsdəki iş adamının ailəsi Prezidentdən imdad diləyir

Artıq xeyli müddətdir ki, Real MTK”-nın keçmiş təsisçisi, hazırda həbsdə olan iş adamı İlham Qasımovun yaxınları və vəkili mətbuata sensasiyalı açıqlamalar verirlər. Həmin açıqlamalarda ortaya qoyulan faktlar, səslənən iddialar iş adamı İlham Qasımovun qanunsuz həbs edildiyini iddia etməyə əsas verməklə yanaşı, bu işin arxasında dayanan şəxsin İlham Qasımovun ailəsinin əmlakını ələ keçirməyə çalışdığını da göstərir.

Xatırladaq ki, yaxınlarının saytımızda da dərc olunan həmin açıqlamalarında bu il noyabrın 30-da 15 il müddətinə azadlıqdan məhrum edilən İlham Qasımovun həbsinin Azərbaycan Respublikası Baş Prokurorluğunun Təşkilat-Analitik İdarəsinin rəisi, general Müqəddəs Sultanovun və onun biznes şəriki, qalmaqallı iş adamı Gülağa Tənhanın sifarişi ilə baş tutduğu iddia edilir. Məhkəmə prosesinə sədrlik edən Zeynal Ağayevin isə bu sifarişi yerinə yetirdiyini, sahibkarı günahsız yerə həbsə aldığını söyləyirlər.

İş adamının adı "MTN işi” çərçivəsində Baş Prokurorluğun Ağır Cinayətlərə Dair İşlər üzrə İstintaq İdarəsində zərərçəkən kimi keçsə də, özü hazırda həbsdədir. Qasımovun ailə üzvləri və eləcə də vəkili Mərdəli Süleymanov bu hökmün qanunsuz olduğunu, iş adamının sifarişlə həbs olunmasının arxasında onun və ailəsinin bütün əmlakını ələ keçirmək niyyətinin dayandığını söyləyirlər.

Qeyd edək ki, İlham Qasımovun barəsində qanunsuz hökmdən Bakı Apellyasiya Məhkəməsinə şikayət olunub. Qarşılaşdıqları haqsızlıqlardan cana doyan ailəsi də, ölkə Prezidentinə və aidiyyatı qurumların rəhbərlərinə müraciət edərək, işə ədalətlə baxılmasını təmin etməyi xahiş edirlər. İş adamı İlham Qasımovun ailəsi tərəfindən Prezident İlham Əliyevə növbəti müraciətdə deyilir:

"Möhtərəm Prezident, sizin ədalətinizə güvənirik”

"Cənab Prezident! Sizin Heydər Əliyev Mərkəzində "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransdakı çıxışınız, bir vətəndaş olaraq dövlətə inam və güvənimizi daha da artırdı. Siz açıq şəkildə məmurlara xəbərdarlıq etdiniz ki, rüşvətxorluq və soyğunçuluqla məşğul olmamalıdırlar: "Burada, əlbəttə ki, məmur-vətəndaş münasibətləri xüsusi yer tutur. Mən dəfələrlə bu məsələ ilə bağlı öz fikirlərimi demişəm, bu gün də deyirəm. Hər kəs bilsin, eşitsin və nəticə çıxarsın: məmurlar xalq üçün yaşayırlar, əksinə deyil. Məmur xalqın xidmətçisidir, vətəndaşa xidmət göstərməlidir, köməklik göstərməlidir, yekəxanalıq etməməlidir, hansısa qanunsuz tələb irəli sürməməlidir, özünü təvazökar aparmalıdır – özü də, ailə üzvləri də, nümunə olmalıdır, rüşvətxorluqla məşğul olmamalıdır, soyğunçuluqla məşğul olmamalıdır. Məmur bax belə, dediyim kimi olmalıdır. Mən hər bir dövlət məmurunu təyin edəndə və ya icra başçısını başqa vəzifəyə qəbul edəndə də göstərişlər verirəm ki, get, insanlara qulluq elə, xidmət elə, dövlətə xidmət elə, təmiz işlə. Amma əfsuslar olsun ki, bəziləri nəticə çıxarmırlar və onların da cəzası verilir və veriləcəkdir. Biz bütün bu işləri görürük ki, Azərbaycanda inkişaf hərtərəfli və sürətli olsun, xoşagəlməz hallara son qoyulmalıdır”.

Möhtərəm Prezident!
Təkrarən diqqətinizə çatdırmağı lazım bilirik ki, Baş Prokurorluğun Təşkilat-Analitik İdarəsinin rəisi, general Müqəddəs Sultanov və özünü cəmiyyətə şair kimi təqdim edən, milyonçu Gülağa Qəmbərov (Gülağa Tənha) tərəfindən qanunsuz və sifarişlə 15 il müddətinə həbs edilən iş adamı, xeyriyyəçi İlham Qasımovun ailəsi olaraq Sizin ədalətliliyinizə güvənirik. Sifarişlə ailəmizin başçısı İlham Qasımov həbs olunsa da, ölkənin hüquq sisteminə və ədalətin bərpa olunacağına yenə inamımız böyükdür.

Lakin Baş Prokurorluğun idarə rəisi Müqəddəs Sultanov və Gülağa Tənha birləşərək, İlham Qasımovun işinə ədalətlə baxılmasına, ədalətin öz yerini tutmasına müxtəlif vasitələrlə maneçilik törədirlər. Müqəddəs Sultanov və Gülağa Tənha ikilisi hökumətdəki bəzi şəxslərə və məhkəmə instansiyalarına İlham Qasımovla bağlı yalan və heç bir əsası olmayan məlumatlar ötürməkdə davam edirlər”.

"Sultanov-Tənha birliyi bəzi məhkəmə instansiyalarını ələ ala bilib”

Daha sonra müraciətdə iş adamının hansı səbəbdən qanunsuz həbsə alındığı, sifarişçilərin və içraçının kimlər olduğu göstərilir. Onların hansı məqsədlərə xidmət etdiyi haqda məlumat verilir:

"Möhtərəm Prezident!
İlham Qasımov da qanunsuz olaraq 15 il həbs cəzasına məhkum olunub. Bu hökmün qanunsuz olduğu məhkəmə prosesi ilə azca tanış olan hər kəsə aydındır. İlham Qasımov özü də dəfələrlə məhkəmə iclaslarında özünün günahsız olmasını sübutlarla ortaya qoyub. Lakin Müqəddəs Sultanovla Gülaga Tənha birliyi bəzi məhkəmə instansiyalarını ələ ala bilib. Buna sübut olaraq Bakı Ağır Cinayətlər Məhkəməsinin hakimi Zeynal Ağayevin qanunlara hörmətsiz yanaşaraq İlşam Qasımovu əsassız olaraq 15 il azadlıqdan məhrum etməsini göstərmək olar.

Bakı Ağır Cinayətlər Məhkəməsinin hakimi, general Müqəddəs Sultanovun yaxın qohumu Zeynal Ağayevin İlham Qasımov haqqında çıxardığı hökm qanunun aliliyi ilə qətiyyən uzlaşmır. İlham Qasımovun özü günahsız olduğu üçün dəfələrlə keçirilən məhkəmədə açıq şəkildə bəyan edib ki, dövlətin ədalətinə inanır. İlham Qasımova verilən ədalətsiz və qanunsuz 15 il həbs cəzası əslində vətəndaşların dövlətimizin hüquq sisteminə olan inamını azaldır. Bu inamsızlığı yaradan isə Baş Prokurorluğun İdarə rəsi general Müqəddəs Sultanov və iş adamına 15 il qanunsuz iş kəsən Bakı Ağır Cinayətlər Məhkəməsinin hakimi Zeynal Ağayevdir.

Bir daha qeyd etməyi lazım bilirik ki, İlham Qasımov "MTN işi”nə görə zərərçəkən şəxs kimi tanınır. MTN-in həbsdə olan keçmiş idarə rəisi Akif Çovdarovun ailəmizin övladlarını qanunsuz həbs etməklə, bizlərə külli miqdarda ziyan vurması ölkə ictimaiyyətinə yaxşı bəllidir.

Eldar Mahmudovun yaxın adamı və dövlətçiliyimiz əlehinə fəaliyyətləri olmuş, 1995-ci ildə dövlət çevrilişinə cəhd edən OMON-çuları maliyyələşdirən bir şəxs kimi tanınan Gülağa Tənha və ortağı, general Müqəddəs Sultanov ölkəmizdə ədalətin təcəlli etməsinə qarşı irədələrini ortaya qoymaqda davam edirlər. Keçən dəfəki müraciətlərimizdə qeyd etmişdik ki, özünü ağıllı sayan ziyalı Gülağa Tənha tez-tez qohumuna məxsus Azpress.az saytında dövlətin bütün qurumlarını kəskin tənqid edən video-müsahibələr yerləşdirir.
Hətta bəzən dövlət başçımıza öyüd-nəsihət belə verməkdən çəkinmir. Halbuki, Gülağa Tənhanı tanıyan şəxslər yaxşı bilir ki, əslində onun özünün nəsihətə ehtiyacı var. Bu yaxınlarda isə Gülağa Tənha yenidən müsahibə verərək Hesablama Palatası başda olmaqla, dövlət qurumlarının bir çoxunu işləməməkdə ittiham edib. Məhz bu cür cılız işlərlə məşğul olaraq, özünü böyük "filosof” sayan Gülağa Qənbərov Müqəddəs Sultanovla birlikdə heç bir qanunun aliliyini tanınaq istəmir”.

"Çovdarov bəlasından qurtardıq, Sultanov və Tənha bəlası başımızın üstünü aldı”

Müraciətdə iş adamı İlham Qasımovun MTN nin keçmiş rəhbərliyi tərəfindən də təzyiqlərə məruz qaldığı xatırladılır: "Möhtərəm cənab Prezident! Siz bütün çıxışlarınızda sahibkarlara qarşı edilən haqsızlıqlardan danışmaqla bərabər onlara lazımı şəraitlərin yaradılmasından bəhs edirsiniz. Məhz sizin səyləriniz nəticəsində bu gün ölkəmizdə minlərlə iş adamı müstəqil fəaliyyət göstərməklə, iqtisadiyyatımıza töhfələr verirlər. Siz son çıxışınızda da icra hakimiyyətlərinin və bəzi dövlət məmurlarının sahibkarlara qarşı müxtəlif təzyiqlərini pisləmiş və dövlətimizin hər zaman sahibkarların yanında olduğunu, olacağını qeyd etmisiniz.

Məhz iş adamı İlham Qasımov da ölkə prezidenti olaraq Sizə güvənərək sahibkarlıq fəaliyyəti ilə məşğul olanlardan biridir. Lakin sizin də dediyiniz kimi, bəzi dövlət qurumlarının sahibkarlara qarşı etdikləri təzyiqlərdən ən çox əziyyət çəkənlərdən biri də məhz iş adamı İlham Qasımovdur.
Bir daha qeyd edirik ki, sahibkarlara qənim kəsilən MTN-nin keçmiş idarə rəisi Akif Çovdarovun cinayət işində iş adamı İlham Qasımov zərərçəkən şəxs qismində çıxış edir. Ancaq biz Akif Çovdarov bəlasından qurtardıq, deyə sevinə bilmədik. Çünki ondan daha betər bəla ilə – Müqəddəs Sultanov və Gülağa Tənha bəlası başımızın üstünü qara bulud kimi aldı.

"Gülağa Tənhanın 4 pasportu var, bir adla ölkəyə girib, başqa bir adla ölkədən çıxır”

Müraciətin sonunda iş adamının ailəsi ölkə Prezidenti İlham Əliyevə, Milli Məclisin sədri Oktay Əsədova, ədliyyə naziri Fikrət Məmmədova, baş prokuror Zakir Qaralova, Prezident Administrasiyasının Hüquq-Mühafizə Orqanları üzrə şöbəsinin müdiri Fuad Ələsgərova, Bakı Apellyasiya Məhkəməsinin sədri İman Nağıyevə müraciət edərək, ədalətin bərpa olunmasına yardım etməyi xahiş edirlər:

"Bir daha sizlərə müraciət edərək, baş verən haqsızlığın aradan qaldırılmasına köməklik göstərməyinizi xahiş edirik. İlham Qasımov hər zaman dövlətinə və onun rəhbərinə sədaqətli bir şəxs olub.
Dəfələrlə muraciətlərimizdə qeyd etmişik ki, ailəmizin başçısı İlham Qasımovun həbsində müstəsna xidməti olan, vaxtı ilə dövlətçiliyimizin əlehinə çıxan, OMON çevrilişinin əsas maliyyəçilərindən biri olan və Müqəddəs Sultanovun biznes şəriki kimi tanınan iş adamı Gülağa Tənha müxtəlif adlar altında fəaliyyət göstərib. İlk müraciətlərimizdə məhz Gülağa Tənhanın Azərbaycandakı uğursuz dövlət çevrilişindən sonra Rusiya Federasiyasına qaçaraq, adını və soyadını dəyişərək bir müddət Albert Mixailoviç Umarov adı ilə yaşadığını bildirmişdik.
İndi də Gülağa Tənha bu bu saxta pasportla ölkəmizə gəlib-gedir. Ancaq apardığımız araşdırmalar nəticəsində məlum oldu ki, Gülağa Qəmbərovun (Tənhanın) 4 pasportu var və bu pasportlardan Azərbaycana girib çıxarkən istifadə edir. Hətta bir adla ölkəyə girən Gulağa Tənha, başqa bir adla ölkəni tərk edir. Onun saxta pasportlarından birində isə adı Qəmbərov Albert Mamedoviç gedir.
Hələki dördüncü adını dəqiq təsdiq etmədiyimizdən sizlərə məlumat verə bilmirik. Lakin qısa müddət ərzində Gülağa Qənbərovun sonuncu qondarma adını da üzə çıxardacağıq.

Bizə verilən məlumata görə, Gülağa Tənha məhz Azərbaycana qeyd etdiyimiz saxta adlarla gəlib-gedir. Ölkəmizə saxta adlarla gəlib-getmək məsələləri daha çox keçmiş MTN naziri Eldar Mahmudovun dövrünə təsadüf edir. Məhz himayəçisi Eldar Mahmudova güvənən Gülağa Tənha, ölkəmizə saxta adla gələrək burada rahat hərəkət edirmiş.

İlham Qasımovun ailəsi olaraq Dövlət Təhlükəsizlik Xidmətinin rəisi cənab Mədət Quliyevə müraciət edərək, Gülağa Tənha ilə bağlı araşdırma aparılmasını xahiş edirik. İnanırıq ki, ölkəmizin təhlükəsizliyində əsas rol oynayan və bu məsuliyyəti şərəflə çiyinləri üzərində daşıyan DTX Gülağa Tənhanın saxta adlar altında hansı fəaliyyətlə məşğul olacağını araşdırıb üzə çıxardacaq.

"İlham Qasımov xəstədir. İki dəfə ürək əməliyyatına məruz qalıb, ədalət istəyirik”

Möhtərəm cənab Prezident! Biz Sizə müraciət edərək xahiş edirik ki, İlham Qasımovun işini şəxsi nəzarətinizə götürəsiniz. Apellyasiya Məhkəməsində İlham Qasımovun işinə ədalətlə baxılıb, azadlığına qovuşmasını ümidlə gözləyirik. İlham Qasımov xəstədir. İki dəfə ürək əməliyyatına məruz qalıb.

Möhtərəm cənab Prezident! Biz, Sizdən sadəcə ədalət istəyirik və buna böyük ümidimiz var. Çünki Azərbaycanda ədaləti Müqəddəs Sultanovlar və Gülağa Tənhalar deyil, məhz Siz Azərbaycan Prezidenti olaraq təmsil edirsiniz. Və bu da bizdə böyük inam hissi yaradır ki, ədalət gec-tez öz yerini alacaq.

Böyük ehtiramla İlham Qasımovun ailə üzvləri”.

Redaksiyadan: İlham Qasımovun ailə üzvlərinin müraciətlərində adı keçən şəxslərin, xüsusən də Müqəddəs Sultanov və Gülağa Tənhanın mövqeyini işğıqlandırmağa hazırıq.

AzPolitika.info

Şərhlər

XƏBƏR LENTİ