Lider TV-nin əməkdaşları 8 aydan çoxdur maaş ala bilmir. Problem səbəbindən peşəkarlar kanalı tərk edir.

Lider TV əməkdaşlarının Qaynarinfo-ya verdiyi məlumatda bildirilir ki, işçilər sonuncu dəfə 2017-ci ilin avqust ayında əməkhaqlarını tam ala biliblər.

Qeyd olunur ki, vergi məsələlərinə görə kanal əməkdaşlarına maaş yarı-yarı verilir: belə ki, orta maaş 400 manatdırsa, bunun 200 manatı kart sistemi ilə, digər yarısı isə nəğd olaraq ödənilir. Ancaq avqust ayından etibarən işçilərə nağd olaraq verilən maaşlar verilmir. Beləliklə, əməkdaşlar artıq üzun müddətdir ki, maaşlarının 50 faizini ala bilirlər.

Bank vasitəsilə ödəniş də gecikir. Əməkdaşların sözlərinə görə, mart ayı olmasına baxmayaraq, yanvar ayının maaşı hələ də köçürülməyib.

Problem səbəbindən Lider TV-də uzun illərdir çalışan bir çox peşəkar telejurnalistin ölkə rəhbərliyinə müraciət də ünvanladığı, sadəcə, mediaya müraciətin mətnini açıqlamadıqları iddia edilir.

"Peşəkar işçilər kanaldan ayrılmağa qərar veriblər. Xəbərlər Departamentində 5 montajçıdan cəmi biri qalıb, 4 nəfər işdən ayrılıb. Boşluğu doldurmaq üçünsə AzTV-dən montajçılar saatla dəvət olunur və onlardan istifadə edilir”, - kanal əməkdaşları bildirib.

Ötən gün isə qalmaqallı hadisə yaşanıb. Xəbərlər Departamentinin Eldar adlı kanaldan ayrılmağa məcbur olan keçmiş əməkdaşı (onun işarə dili ilə efirə verilən xəbərlər proqramında çalışdığı deyilir) bıçaqla Lider TV-yə gələrək, maaşı ödənilməyəcəyi halda özünə xəsarət yetirəcəyini deyib. Mühafizəçilərin çətinliklə sakitləşdirdiyi əməkdaşı Lider TV-nin rəhbəri qəbul edib və ona 200 manat ödənilib. Qalan maaşının isə yaxınlarda ödəniləcəyi vəd edilib.

İşdən ayrılanların maaşı ödənilmir, israr edənlərin əmək kitabçalarına isə növbəti iş yerinə qəbulda problem yaradacaq "maddə” (Əmək Məcəlləsində işdən azad edilməsi üçün işçinin məsuliyyətsizliyini əks etdirən 70-ci maddə - red.) yazılır.

Yaranmış problemlərlə əlaqədar saytımıza açıqlama verən Lider TV-nin xəbərlər departamentinin rəhbəri Anar Şükürov bildirib ki, əksər şirkətlərdə olduğu kimi, Lider TV-də də müəyyən problemlər var: "Maaşla bağlı çətinlik digər kanallarda olduğu kimi bizim kanalda da var. Ancaq bu o demək deyil ki, ümumiyyətlə 8 aydan çoxdur maaş verilmir. Bəzi hallarda əməkhaqları verilir. Həmçinin vəziyyətdən çıxmaq üçün tədbirlər görülür. Ancaq "ümumiyyətlə maaş verilmir” məsələsi yoxdur. Az-az da olsa işçilərə maaş verilir”.

Xəbərlər Departamentində çalışan montajçılardan 4-nün işdən ayrılmasına da aydınlıq gətirən A.Şükürov bildirib ki, belə bir problem yoxdur: "Xəbərlər Departamentinə məsul olan şəxs kimi deyə bilərəm ki, departamentimizdə hazırda 4 montajçımız var. Hər biri də Lider TV-də çalışan əməkdaşlardır”.

Kanalın peşəkar əməkdaşlarının problemlə əlaqədar ölkə rəhbərliyinə müraciətindən danışan A.Şükürov bildirib ki, bu barədə məlumatlı deyil.