..Adı gerçəkdən tarixə düşən və sonuncu dəfə yandırılmasından təxminən 8 il keçən, “Vosmoy bazarı” kimi tanınan “8-ci km Ticarət Mərkəzi” ASC ətrafında müəmmalar səngimir. 30 ildən çoxdur Nizami rayonunun Naxçıvanski küçəsi ərazisində salınmış bu bazar artıq faktiki olaraq həmin küçə boyu bütün əraziləri əhatələyib.

Ərazidə yaşayan sakinlərin isə demək olar dincliyi yoxdur, bazarın yan-yörəsindəki yaşayış binalarında yaşayan sakinlər gündüzlər metorunun “Xalqlar dostluğu”-”Neftçilər” stansiyalarını birləşdirən Q.Qarayev prospektində tıxaca düşən maşınların siqnallarından, səs-küyündən dincliyini itirbsə, gecədən başlayan bazar hay-küyü də bu biri tərəfdən əhalinin dincliyini əlindən alıb.
Naxçıvanski küçəsində yaşayan sakinlərin adından geniş şikayət məktubu yazan Rəsul Axundov məktubunu həm də Prezident İlham Əliyevə ünvanlı yazıb. Şikayətçi məktubunun əvvəlində redaksiyaya ünvanlı kiçik bir qeydini də yazıb: “Bu günlərdə sizin qəzetdə “Vosmoy” bazarının faktiki rəhbəri və idarəedəni, ağsaqqalı olan Rauf Şirəliyevin “Astoriya” otel-istirahət mərkəzinin nəzdində olan “Sərin” restoranındakı məxsusi kabinetində MTN işi ilə bağlı barələrində istintaq aparılan şəxslərin nümayəndələri ilə, həmçinin Dövlət İqtisad Universitetinin prorektoru olan Damət Bağırov adlı şəxslərlə gizli görüşməsi və sair barədə qeydləri oxudum. Məlumat üçün bildirim ki, “Vosmoy” bazarında mənim qardaşımın da pal-paltar dükanı və meyvə-tərəvəz satışı yeri var. Yəni, bu bazarda son 20-30 ildə nələrin baş verdiyini yaxşı bilirəm. Diqqətinizə çatdırım ki, Rauf Şirəliyevin gizli görüşdüyü şəxslərdən biri Damət Bağırov vaxtilə Əmlak Komitəsinin Özəlləşmə idarəsində rəis idi. Rauf Şirəliyevin də yaxın dostudur, onu şəxsən iki dəfə müxtəlif vaxtlarda, yəni bazarın başının üstünü qara buludlar alanda onun kabinetində görmüşük. Bir dəfə də bazarda yanğın olmuşdu, həmin vaxtlarda. Bazarın Rauf Şirəliyevin əlində qalmasında, özəlləşmə işlərində Damət Bağırovun böyük xidməti olub. İndi də ona müəyyən sahələrdə dəstək verir. Bilirsiniz ki, MTN-də yuva qurmuş cinayətkar dəstələrdən birinin üzvü də Akif Çovdarov idi. Bazarın əsas gəlirli sahəsi olan və meyvə-tərəvəzin topdansatış bazarı kimi tanınan hissəsini Akif Çovdarov ələ keçirmişdi. Faktiki olaraq Rauf Şirəliyevin maraqları pozulmuşdu. Amma Çovdarovun əlaqələri çoxdur və həbs olunsa da, onlar vaxtilə həmin ərazini ailəsinin adına sənədləşdirəndə ən azı dövlətə xeyli pul ödəyiblər. Görünür, “Sərin” restoranında baş tutan gizli görüş də məhz Akif Çovdarovun adamları ilə, eləcə də bu işdə vaxtilə dəstək vermiş Damət Bağırovla nələrsə müzakirə edilir. Bunu araşdırın. Əminəm ki, Dövlətimizin ümumi siyasətinin ziddinə olan müzakirələrdir”.

““Vosmoy bazarı” bir qrupa qazanc, yüz minlərlə sakinə isə acı həyat bəxş etməkdədir...”

Aşağıda qeyd olunan və Prezident İlham Əliyevə ünvanlı müraciəti kiçik ixtisar və bəzi düzəlişlərlə təqdim edirik:
- Hörmətli cənab Prezident!
Siz bütün var gücünüzlə çalışırsınız ki, Azərbaycan insanı sakit və firavan həyat sürsün. Amma təəssüflər olsun ki, Qarabağ problemi bütün Azərbaycanın, “8 KM bazarı” isə biz Nizami rayonunun Naxçıvanski küçəsi sakinlərinin dincliyini əlindən alıb. Belə ki, mən bu küçədə 30 ildən çoxdur, vaxtilə Darvin küçəsi adlandırılan küçədə yaşayıram. Əvvəllər yenə bir təhər dözürdük, indi bazar həyətimizə gəlib girib. Gecələr “optovoyşik”lərin əlindən tərpənə bilmirk, xəstəmiz olanda təcili yardım maşını, yaxud şəxsi avtomobilimizlə evimizə gələ bilmirik. İstirahət günləri isə vəziyyət lap dözülməz olur. Metronun “Xalqlar dostluğu” stansiyasından “Neftçilər” stansiyasını birləşdirən 2 km-lik ərazidən başlayan bazar artıq arxa hissədən “Razin”ə gedib çıxıb. Həyətlərimiz bazarın tör-töküntüləri ilə dolub-daşır, balıq, hər yer digər ət məhsullarının tullantılarının zibilxanasına çevrilib, köhnə ərzaq məhsullarının hara gəldi tullanması nəticəsində mənzillərimiz milçəklərin vızıltısının, həyətlərimiz isə küçə itlərinin hürüşmə meydançasına çevrilib. Biz kimlərinsə milyonlar qazanmasının əleyhinə deyilik, amma niyə bu qazanc on minlərlə insanın həyatına zəhər qatılması ilə olmalıdır?
Cənab Prezident!
Naxçıvanski və digər ətraf ərazilərdə on minlərlə əhali yaşayır. Onların həyatını zəhərə döndərmiş bu bazar ərazidən köçürülməsə, vəziyyət kritik olacaq. Bizlər 5 və 9 mərtəbəli binalarda yaşayırıq. Yuxarı mərtəbələrdən aşağı-bazara baxanda bazar Afrikanın hansısa ölkəsindən qovulan və düzəngahda sığınacaq tapmış qaçqınların dağılmış çadır evlərinin xarabalığına oxşayır. Şəhərin mərkəzində bu nə zibilxana mənbəyidir? Necə olur ki, o boyda “Binə” və “Sədərək” bazarları kənara köçürüldü, amma paytaxtın ən mənzərəli ərazisi isə xarabalığı xatırladan bir görkəmdədir.
Cənab Prezident!
Bizi narahat edən əsas məsələ həm də budur “Vosmoy bazarı” Nizami rayonunda Ulu Öndər Heydər Əliyevin adını daşıyan parkla üz-üzədir. Bəzən əhalinin istirahət yeri olan bu möhtəşəm parkda təmiz hava udmaq mümkün olmur, çünki bazardan qalxan ufunət iyi ətrafı bürüyür, küləkli havalarda isə bazarın bütün zir-zibili parka qədər uçub gəlir. Nizami rayonunun İcra başçısı ərazilərdəki şamlıqları kəsdirib yerində dükan açdırmaqla məşğuldur, amma Ulu Öndərin adını daşıyan Parka bitişik olan bu bazarın ərazidən başqa münasib yerə köçürülməsi, ərazidə qayda yaradılması barədə düşünmür. Vaxtilə həyətlərimiz nümunəvi ərazi idi, indii xarabalığa çevrilib. Ona görə ki, bazarın faktiki sahibi olan Rauf Şirəliyevin yaxın adamıdır və bazarın müəyyən hissəsində əli var? Halbuki Ulu Öndər Heydər Əliyevin adını daşıyan İstirahət Parkının ərazisi qarşı tərəfə uzadılmaqla “8 KM bazarı”nın olduğu əraziyə qatılsa, görün nə boyda istirahət parkı yaranar. Amma bir qrup bazar adamı ərazini zibilxanaya döndərib. Yağmurlu havalarda bu ərazilərdə tıxac əlindən tərpənmək olmur, bazarın içində isə palçıq dizə çıxır. Biz “8 KM qəsəbə” sakinləri, xahiş edirik, bu bazarın ərazidən köçürülməsinə, yerində isə bazarla üzbəüzdə olan və Ulu Öndərin adını daşıyan İstirahət Parkının genişləndirilməsi üçün təmizlik və bərpa işlərinin təmin olunmasına tapşırıq verəsiniz.
Bəs bazarın rəsmi sahibi niyə üzə çıxmır?

Şikayətçi vətəndaş bu suala belə aydınlıq gətirib: “Diqqətinizə çatdırırıq ki, MTN-dəki dəstə zərərsizləşdiriləndən iki ay sonra bazar qarışdı, heç kim hələ heç nə bilmirdi. Rauf adlı bazar sahibi işçilərini göndərdi ki, bazarın təsisçiliyi dəyişir, yenidən müqavilələr bağlanacaq. Sonra məlum oldu ki, artıq rəsmi qaydada yeni sahib var. 7 fevral 2015-ci il “8-ci km bazarı”nın yeni sahibinin adı axır ki, rəsmən açıqlandı. Məlum oldu ki, “8-ci km Ticarət Mərkəzi” ASC yaranıb, bazar özəlləşdirilib, amma səhmdarların xəbəri olmayıb. Sən demə, tender keçirilib, Bəhram Qurbanov adlı şəxs bazarın sahibi olub. Amma bu günə kimi onu bu ərazidə görən olmayıb. Biz sakinlər dəfələrlə anti-sanitar vəziyyətə dözməyib onun qəbuluna getmişik ki, heyvan mənşəli leş və meyvə-tərəvəz tullantılarının həyətlərimizə atılmasının qarşısının alınmasını ondan tələb edək, deyiblər ki, gedin Rauf Şirəliyevin yanına. O isə bildirib ki, mən bazarın elə-belə sahibiyəm, rəsmi adam Bəhram Qurbanovdur. Belə vəziyyətdə biz nə etməliyik, bilmirik. Yeganə çıxış yolu isə bazarın buradan köçürülməsidir. Əks halda, özümüz bu ərazilərdən harasa köçüb getməliyik”.
***
Xatırladaq ki, Əmlak Məsələləri Dövlət Komitəsi “Azərbaycan Respublikasında dövlət əmlakının özəlləşdirilməsinin II Dövlət Proqramı”na və Azərbaycan Prezidentinin 17 iyul 2001-ci il tarixli fərmanı ilə təsdiq edilmiş “İnvestisiya müsabiqəsinin keçirilməsi Qaydaları”na müvafıq olaraq 2015-ci ilin fevralında “8-ci km Ticarət Mərkəzi” ASC-nin səhmlərinin satışı üzrə investisiya müsabiqəsi elan etmişdir. Müsabiqədə iştirak etmək üçün üç iddiaçı tərəfindən ərizə və investisiya təklifləri təqdim edilib. Azərbaycanın müvafiq nazirlik və təşkilatlarının nümayəndələrinin daxil olduğu Müsabiqə Komissiyasının qərarına əsasən, hər üç iddiaçı iştirakçı statusunu əldə edib. Komissiya müsabiqə iştirakçılarının təqdim etdikləri investisiya təkliflərinə baxdıqdan sonra 16 yanvar 2015-ci il tarixində açıq səsvermə yolu ilə qərar qəbul edib və investisiya müsabiqəsinin qalibi elan edilib. Müsabiqənin şərtlərinə əsasən, müsabiqə qalibi dövlət büdcəsinə 312 iki min manat məbləğində pul vəsaitinin köçürülməsini, habelə İnvestisiya Proqramına əsasən, 6 ay ərzində “8 KM bazarı”na 1 180 760 manat məbləğində investisiya qoyuluşunun həyata keçirilməsini öhdəsinə götürüb. Amma yuxarıdakı şikayətdən göründüyü kimi, nə bazarın təzə sahibi olan Bəhram Qurbanovu, nə də onun bazardakı xaosu və anti-sanitarik vəziyyəti qaydaya salmaq üçün xərclədiyi pulunu görən olub. Bazarda isə son yağmurlu havaların yaratdığı çirkab və üfunətli vəziyyət davam etməkdədir.

- Bəs vətəndaşlar bazarla bağlı şikayətini söyləmək üçün bazarın rəsmi sahibi Bəhram Qurbanovu necə görə bilərlər?
- “Bazarın faktiki sahibi Rauf Şirəliyev “Sərin” restoranında Çovdarovun adamları ilə görüşübmü?
- Bu görüşdə Dövlət İqtisad Universitetinin prorektoru Damət Bağırov hansı statusla çıxış edib və nəyi müzakirə edib?
- “8 KM bazarı” Çovdarovun əlinə kimin diqtəsi və istiqaməti ilə verilibmiş, bu işdə bazarın faktiki sahibi Rauf Şirəliyevin rolu olmuşdurmu?

(Davamı var)
“Təzadlar”ın Araşdırma Qrupu