Şairin qardaşı rüşvət vermədi, icra məmurunun qəzəbinə gəldi - GİLEY

Şairin qardaşı rüşvət vermədi, icra məmurunun qəzəbinə gəldi - GİLEY Tanınmış gənc şair Cəlil Cavanşir Oğuz rayon İcra və Probasiya şöbəsinin əməkdaşlarının özbaşınalığından şikayətlənib.

İcra məmuru Tural Abdurahmanov bank borcuna görə şairin atasından rüşvət istəyib:

"Qardaşım "TBC kredit" təşkilatına 4370 manat borclu olduğu və bu krediti ödəyə bilmədiyi üçün "TBC kredit" onu məhkəməyə verib. Məhkəmə təşkilatın xeyrinə qərar çıxarıb. Qardaşım borcunu hissələrlə təşkilatın hesabına ödəməlidir. Ancaq bu məqamda Oğuz rayon İcra və Probasiya şöbəsi hərəkətə keçib.

İcra məmuru Tural Abdurahmanov qardaşımla əlaqə saxlayıb və borcun daha az hissələrlə ödənilməsi barədə qərar çıxarmaq üçün atamdan 500 manat rüşvət istəyib. Qardaşım təbii ki, rüşvət verməyəcəyini, ancaq borcun qardaşım tərəfindən ödəniləcəyini bildirib. İcra məmuru Tural Abdurahmanov cənabları isə əsəbiləşərək qardaşımın iş yerinə icra sənədi göndərib və boşandığı üçün üç övladı qəyyumluğunda olan, eyni zamanda səhhətində ciddi problemlər yaşanan qardaşımın maaşından hər ay 50% tutularaq "TBC kredit"in hesabına köçürülməsini təmin edilməsini tələb edib.

Bundan əvvəl də eyni şəkildə başqa bir icra prosesində icra məmuru Tural Abdurahmanov qardaşımdan rüşvət tələb edib, ala bilmədikdə isə qardaşımın əleyhinə qərar qəbul edib.

Azərbaycan Respublikası Ədliyyə Nazirliyi regionlarda fəaliyyət göstərən icra məmurları vətəndaşdan rüşvət tələb edib, ala bilməyəndə ədalətsiz qərar verirsə, buna kim cavab verməlidir? Sırf rüşvət vermədiyi üçün maaşının 50%-i tutulan qardaşımın üç azyaşlı övladı nə ilə yaşamalıdır?”. //Qaynarinfo.az//
Geri qayıt