Zeybulla Şükürov səfərbərliyə cəlb olunan oğlunu müharibədən necə yarımçıq geri qaytarıb? – İLGİNC

Zeybulla Şükürov səfərbərliyə cəlb olunan oğlunu müharibədən necə yarımçıq geri qaytarıb? – İLGİNC Söz vaxtına çəkər. Düz 3 il əvvəl, noyabr ayının əvvəlində Bakı Ağır Cinayətlər Məhkəməsində dələduzluqda təqsirləndirilən Bənövşə Süleymanovaya 7 il müddətinə azadlıqdan məhrum edilməsi barədə hökm oxundu. Bənövşə Süleymanova Azərbaycan Dövlət Neft Şirkətinin (SOCAR) əməkdaşı olub. Cinayət Məcəlləsinin 178.3.2-ci (külli miqdarda dələduzluq törətmək) maddəsi ilə irəli sürülən ittihama görə, o, vəzifə səlahiyyətlərindən istifadə edərək zərərçəkmiş bir neçə şəxsin etibarından sui-istifadə edib, onları SOCAR-ın müxtəlif idarələrində işə düzəldəcəyini deyib və ümumilikdə 100 min manata yaxın pullarını dələduzluq yolu ilə ələ keçirib.
Zərərçəkmiş qismində tanınan şəxslərdən biri də hələ o vaxt Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti Astara rayon Məşğulluq Mərkəzinin direktoru işləyən Zeybulla Şükürov idi. Dövlətin sosial siyasətini həyata keçirməklə vəzifələndirilmiş məmur görün bir neyləyib! – Oğlu Famil Şükürovu Neft Şirkətində işə düzəltmək üçün rüşvət veribmiş. Aktiv rüşvət tərəfi olmasına baxmayaraq, puldan keçə bilməyib, hüquq-mühafizə orqanlarına müraciət etməklə özünün və təmsil etdiyi qurumun nüfuzuna kölgə salmaqdan çəkinməyib.
Bu məsələ 3 il əvvəl – “dünyanın düz vaxtı” olub. İndi isə gəlin görək, hazırda Astara Rayon İcra Hakimiyyətində məsul vəzifə tutan dövlət qulluqçusu Zeydulla Şükürov oğlu Famil üçün bu gün – Azərbaycanın Böyük Vətən müharibəsi apardığı dönəmdə nə edib. Etibarlı mənbədən bizə verilən məlumata görə, Famil Şükürov həqiqi hərbi xidmət dövründə əhəmiyyətli hərbi vəzifəli olduğundan, sentyabrın sonu – oktyabrın əvvəlində qismən səfərbərliyə cəlb olunubmuş. Bir neçə gün (iddia olunur ki, 11 gün cəbhədə “xitmət” edib) cəbhədə olandan sonra görüb ki, bu həna o hənadan deyil və atasına ismarıc göndərib ki, bəs, “gəl, məni qurtar!” Yaxud da əksinə, Zeybulla Şükürov qonum-qonşudan, qohum-əqrəbadan şəhid xəbərləri gələndən sonra əl-ayağa düşüb ki, “SOCAR-a işə düzəldə bilmədim-bilmədim, uşağı heç olmasa bu təhlükədən qurtarmalıyam, Vətəni qorumaq ona qalmayıb, torpaq uğrunda ölmək kasıb-kusubun işidir”. Və elə həmin mənbənin bildirdiyinə görə, Zeybulla Şükürov oğlunu geri qaytarmağa müvəffəq olub və bundan ötrü Bənövşəyə verdiyindən heç də az “tərləməyib”.
Düşünürük ki, ölkənin aidiyyəti orqanları, eləcə də Səfərbərlik və Hərbi Xidmətə Çağırış üzrə Dövlət Xidməti bu məsələni araşdırmalıdır. Çünki hərbi vəzifə və rütbə onu daşıyana heç də dinc dövrdə əlavə maaş və imtiyaz, səlahiyyət qazandırmaq üçün verilmir, müharibədə, Vətənin dar günündə hərbi bilik və bacarıqları kara gəlsin deyə verilir.(Stv news)
P.S. Növbəti günlərdə Zeybulla Şükürov oğlu Famil Şükürovu hansı yollarla və vasitələrlə müharibədən yarımçıq qaytardığını, eləcə də bu yolda nəqədər xərclədiyi məbləğ barədə oxucularımıza ətraflı bilgilər verəcəyik.
Yazıda qeyd olunan iddialarla bağlı qarşı tərəfin mövqeyini dinləməyə və dərc etməyə hazırıq!
RealMedia.az
Geri qayıt