Azərbaycan Respublikasının Prezidenti İlham Əliyev ötən ilin fevralında vətəndaşların problemli kreditlərinin həlli ilə bağlı əlavə tədbirlər haqqında Fərman imzaladı.

Fərmanda qeyd olunurdu ki, Azərbaycan Respublikasında əhalinin rifahını yüksəltmək, sosial müdafiəsini və layiqli həyat səviyyəsini təmin etmək dövlətin sosial-iqtisadi inkişaf konsepsiyasının prioritetlərindəndir və Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, dünya bazarında neftin qiymətinin 3-4 dəfə azalması ilə bağlı baş vermiş devalvasiya nəticəsində fiziki şəxslərin xarici valyutada olan kreditləri üzrə onların üzləşdiyi maliyyə itkisini qarşılamaq, o cümlədən problemli kreditlər məsələsinin həllinə dövlət dəstəyini təmin etmək məqsədilə fiziki şəxslərin banklara 10 000 (on min) ABŞ dollarınadək xarici valyutada olan əsas kredit borclarının devalvasiya ilə bağlı manatla artmış hissəsi aşağıdakı qaydada qiymətləndirilməklə, bu Fərman qüvvəyə mindiyi günə Azərbaycan Respublikası Mərkəzi Bankının elan etdiyi məzənnəyə uyğun olaraq, dövlət büdcəsinin vəsaiti hesabına üç aydan gec olmayaraq manatla ödənilməsin.
Bununla da bankdan kredit götürmüş, lakin məlum devalvasiya prosesi nəticəsində ağır durumla üz-üzə qalan vətəndaşların problemləri həllini tapdı. Prezidentin fərmanı ilə minlərlə vətəndaşımız banklara əlavə ödənişlərini geri almağa başladılar. Bu da əhalinin maddi durumunun yaxşılaşmasına xeyli yardım etdi. Lakin üzərinə düşən öhdəliyi hələ də yerinə yetirməyən, vətəndaşa çatacaq məbləği ödəməyən banklar var. Məlumdur ki, fəaliyyəti dayandırmış banklar da var. Və bu hal da problemli kreditlərin həllinə mane olur.
Quliyev Bəxtiyar Muxtar oğlu ona ödənməli olan kompensasiyasını bir ildir ki, ala bilmir. B.Quliyev “Royal Bank”dan 21 iyun 2012-ci il tarixdə 24 ay müddətinə 26 faiz dərəcəsi ilə 6300 ABŞ dolları məbləğındə kredit götürüb, 2016-cə il 29 dekabr tarixində öhdəlik yerinə yetirlib. Vətəndaş ödənilən faiz hesablanmaqla həmin banka 17 min 354 manat ödəyib.
Vətəndaşa çatacaq kompensasiyasının məbləği əvvəlcə 5200, amma sonar 4900 manat hesablanıb. İş burasındadır ki, nə 5200, nə də 4900 manatı qaytaran var. Vətəndaş öncə Maliyyə Bazarlarına Nəzarət Palatasına müraciət edib. Apelyasiya komissiyası işə baxıb. “RoyalBank” vətəndaşın banka heç bir borcunun olmadığına dair sənəd təqdim edib. Bu proses də 2 ay çəkib. Palata ləğv olunduqdan sonra kompensasiyaların ödənməsi Mərkəzi Banka həvalə edilib. Lakin B.Quliyev Mərkəzi Bankdan hələ də bir cavab ala bilmir. Hər dəfə bankdan “gözləyin” deyirlər. Amma nəyi gözləməlidirlər, bunu deyən yoxdur. Vətəndaş bildirir ki, Mərkəzi Bankın sədri Elman Rüstəmov çıxışında “problemli kreditlər həll olunub” deyir, amma problemi həll olunmamış vətəndaşlar var hələ də. B.Quliyev Milli Bankdan Prezident fərmanına əməl olunmasını tələb edir.