Azərbaycan hakimiyyətinin cəmiyyətimizə sırıdığı yeni əxlaq normalarından biri də valideynlərin balalarından, balaların valideynlərindən imtina etməsidir
SSRİ-nin Morozov nümunəsini cəmiyyətimizə tətbiq edən “rusqafalı”ların siyasi müxalif ailələrinə dözülməz təzyiqlər nəticəsində hər gün yeni imtina bəyanatları ilə tanış oluruq.
Sözügedən bəyannamələrdə, adətən, yaxın qohum-əqraba siyasətə “bulaşmış” müxalifləri öz klanlarından çıxarırlar - ibtidai icma quruluşlarına məxsus tayfa adət-ənənələrində olduğu kimi.
Bu səfər isə tanınmış yazıçı Zümrüd Yağmur həmin ənənəni pozub. Qohumlarına edilən təzyiqləri nəzərə alan yazıçı özü könüllü şəkildə “imtina bəyannaməsi”nə imza atıb.
“Bu yazını yazmaqdan uzun müddət yayındım. Açığını deyim ki, qarşılaşdığım təhdid və ya təyziqləri yazmaq kimi vərdişim yoxdur. Amma indi yazmamaq kimi bir lüksüm də yoxdur.
Burdan kimsəyə, ayrıca olaraq hansısa quruma və ya şəxsə müraciət etməyəcəm. Yəqin ki, hər kəs özünə aid olan hissəni anlayacaq. Artıq uzun müddətdir ki, doğulub böyüdüyüm ailə üzvlərimə müxtəlif təziqlər olur. Niyə? Çünki onların bacısı Zümrüd Yağmurdu və birilərinə görə mən vətən xainiyəm. Bu düşüncəyə şərh verməyəcəm. Sadəcə, burdan bəyan edirəm k, doğulub böyüdüyüm ailədən necə deyərlər, bağımsızlığımı 18 yaşında elan etmişəm. Bu həyatda atamdan daha çox dəyər verdiyim biri də olmayıb, mənim üçün məğrur bir insan kimi məhz qüruru, əl öpməməyi, yaltaqlanmamağı, inandıqları üçün inadkar olmağı və prinsipiallığı dəyər kimi qoyub getmiş o Böyük İnsan övladı üçün rahatsız olub bunu dilə gətirəndə, məndən daha ehtiyatlı olmağı istəyəndə ona belə azadlığım, əqidəmdən güzəştə getməmişəm. Atama getmədiyim güzəşti də indi kimsəyə getmək niyyətində deyiləm.
Mənim üçün doğmalıq primal bağdan ibarət deyil. Doğulub böyüdüyüm ailəmlə heç bir əlaqəm yoxdur, şərait elə gətirib ki, yollarımız çoxdan ayrılıb. Hətta bacım dünyasını dəyişəndə ancaq dəfndə iştirak edib geri dönmək məcburiyyətində qalmışam. İndi olanlar, mənə olan basqılar geri addım atmam üçün səbəb ola bilməz. Əgər sizə imtina etməmi açıq dilə gətirmək lazımdırsa, bəyan edirəm ki, mən öz ailəmdən imtina edirəm və bundan sonra onlara olacaq basqıların mənə heç bir aidiyatı yoxdur”.
Yazıçının dünən facebook səhifəsində paylaşdığı “imtina ərizəsi”ni oxucularımıza təqdim edirik:

ovqat.com