Ötən gün mistik janrda çəkilən “Xənnas” filminin qala gecəsi keçirilib. Ekran işinin təqdimatı Nizami Kino Mərkəzində baş tutub.
Gecədə xalq artistləri Fuad Poladov,Ramiz Novruz, əməkdar artistlər Dilarə Əliyeva, Rafael İsgəndərov, Lalə Məmmədova, müğənni Günay İbrahimli, teleaparıcı Günel Hümbətova və başqaları iştirak edib.
Təqdimata filmin qəhrəmanları Zemfira Əbdülsəmədova, Hikmət Rəhimov, Qorqud Cəfər, Türkay Cəfərli, Pərvin Abıyeva, Nərgiz Əliyeva, Zarina Qurbanova da qatılıb. Bundan əlavə, qalada türkiyəli aktrisa Pelin Sönməz iştirak edib.
Ekran işinin qala gecəsi yüksək səviyyədə təşkil olunub. Qırmızı xalça, xüsusi dekorasiya və s. kimi məsələləri misal çəkə bilərik.
Layihə Azərbaycanda ilk mistik janrda çəkilən filmdir. Kinonun nümayişindən öncə filmin heyəti səhnəyə çıxıb. Rejissor Elvin Abdullayev həmin gecə Azərbaycanda ilklərin yaşandığını söyləyib. O, ilk dəfə Bakıda Hollivudsayağı təqdimatın reallaşdığını qeyd edib:
“Filmdə peşəkar aktyor heyəti iştirak edib. İnanırıq ki, bu kino hər birimiz üçün uğurlu olacaq. Ekran işinə 200 mindən yuxarı məbləğ xərcləmişik və bir milyon pul qazanmağa iddialıyıq”.
