Türkiyənin Adana şəhərində rəsmi işçi kimi qeydiyyatda olan, hər ay məvacib alan, lakin ölkə xaricində yaşayan şəxslər müəyyən edilib.
Virtualaz.org Türkiyə KİV-nə istinadən xəbər verir ki, bunlar Adana Şəhər Bələdiyyəsinin Nəqliyyat şirkətində çalışan, lakin 4 aydan artıqdır ki, Türkiyəyə gəlməyən 3 nəfər türk əsilli şəxsdir. Məlum olub ki, bu şəxslərin adları işçi kimi siyahıda olsa da, əslində Azərbaycanda yaşayırlar.
Mənbənin yazdığına görə, araşdırma zamanı həmçinin eyni şirkətdə çalışaraq işə getməyən, nadir hallarda gedəndə isə şəxsi “Mercedes” avtomobilindən istifadə edən digər işçilərin də olduğu üzə çıxıb. Üstəlik, şirkət 10 işçinin görə biləcəyi işi 30-40 nəfərə gördürməklə büdcəyə ziyan vurur.
Saytın yazdığına görə, Adana Şəhər Bələdiyyəsi işə gəlməyən işçilərlə bağlı tədbirlər görməyə başlayıb və həmin şəxslər işdən azad ediliblər.
