[center][medium]https://azad.media/uploads/posts/2021-12/1640591539_bum_qbl.png[/medium][/center]

[center][medium]https://azad.media/uploads/posts/2021-12/1640591539_bum_qbl.png[/medium][/center] Qəbələ rayonunun Tikanlı kəndində yaşayan şəhid ailəsi Bayramov Ayaz Ağanməd oğlu dövlət başçısına müraciət ünvanlanıb.

Xalqxeber.az tezadlar.az-a istinadən xəbər verir ki, müraciətdə deyilir:

"Hörmətli cənab Prezident!

Mən hazırda 6 nəfərlik ailəmlə və eyni zamanda 3 bacımla (cəmi 9 nəfər olmaqla) birlikdə 50 ildir Qəbələ rayonunun Tikanlı kəndindəki ata yurdu olan, 4 sot torpaqda yerləşən 3 otaqlı köhnə və təmirsiz fərdi evimdə yaşayıram. Bir neçə il əvvəl vəfat edən atam Ağəmməd Bayramov evimizin və həyətyanı torpağımızın çox darısqal olduğunu nəzərə alaraq, yəni evdə 2 oğlu və 3 qızının, eyni zamanda 3 nəvəsinin yaşadığı köhnə evdə heç bir şərait olmadığına görə 1997-ci ildə “Şahdağ” Aqrqar İslahat Komissiyasına ərizə ilə müraciət edərək 0.2 ha həyətyanı torpaq sahəsinin verilməsini xahiş etdi. Yerli Aqrar İslahat Komisiyası da ərizəyə müsbət cavab verdi. Faktiki vəziyyəti yerində yoxladıqdan sonra atama şəhid ailəsi kimi yaşadığımız kəndin yaxınlığında - 700 metrdə yerləşən, lakin qonşu Qəbələ rayonunun Bum kəndi ərazisinə düşən bağ sahəsindən həyətyanı torpaq kimi 0.2 ha sahə qanuni formada ayrıldı. Biz həmin torpaq sahəsinin kənarını bərkidərək, daxilini daşlardan təmizlədik, ağac əkdik və ev tikmək üçün normal hala saldıq. Lakin çox təəssüflər olsun ki, həmin ərazi 2000-ci ildən sonra yerli Bum Bələdiyyəsinə verildi. Lakin yerli bələdiyyə bizim ailəyə ayrılan torpaq sahəsinin biz şəhid ailəsinə sənədləşməsinə müxtəlif bəhanələrlə imkan vermədi. Son illərdə isə daha irəli gedərək özbaşına - bizim razılığımız olmadan həmin bizə verilən ərazini kənar fiziki şəxslərə dəflərlə arxa tarixlə satmaq istədi. Lakin biləndə ki, bu kənarı bərkidilmiş ərazi 1997-ci ildən biz şəhid ailəsinə verilib, o zaman sakinlər verdikləri pulu bələdiyyədən geri alaraq getdilər. Xatırlatmaq yerinə düşər ki, hazırda bizim yaşadığımız Tikanlı kəndi hər iki tərəfdən çay vadisi ilə əhatə olunduğundan bələdiyyənin fondunda torpaq sahəsi yoxdur.

Atam sağlığında dəfələrlə yerli DTXK-nin Qəbələ rayon şöbəsinə rəsmi müraciətlər edərək, ona verilmiş həmin 0.2 ha torpaq sahəsinin mülkiyyət sənədini almaq istədi. Lakin qurum hər dəfə 16 mart 2007-ci ildə verdiyi rəsmi cavabda qeyd edir ki, “Yaxın vaxtlarda sizin tələb etdiyiniz sahənin mülkiyyət hüququna dair şəhadətnaməsi hazırlanaraq sizə təqdim ediləcəkdir”.

Lakin tam rüşvət vermədiyi üçün onu illər uzunu süründürməçiliyə saldılar. Nəhayət, son müraciətimə bu ilin 16 iyununda Əmlak Məslələri DK-nin Daşınmaz Əmlakın Dövlət Reyestr Xidməti rəisinin müavini Elşad Məmmədovun əsassız cavabını aldıq: “Bum kəndi, “Şahdağ” kolxozu, Yerli Aqrar İslahat Komissiyasının tərtib etdiyi 25 dekabr 1997-ci il tarixli torpaq sahəsinin seçilməsinə dair aktı hüquq müəyyənedici sənəd deyil, həmin torpaq sahəsinin yerini müəyyənləşdirməyə imkan verən texniki sənəd olduğundan, sözügedən aktda göstərilən 0.2 ha torpaq sahəsi üzərində hüquqların dövlət qeydiyyatına alınması mümkün olmamışdır”.

Belə olan halda ortaya sual çıxır: Bəs niyə qonşuluqda Yerli Aqrar İslahat Komisiyasının qərarı əsasında paylanmış digər torpaq sahələrinə DƏK-in Qəbələ 9 saylı Ərazi Reyestr İdarəsi tərəfindən mülkiyyət sənədləri verilmişdir? Bəli, vaxtilə AR Dövlət Torpaq və Xəritəçəkmə Komitəsi tərəfindən bizə ayrılan 2000 kv.m torpaq sahəsi üçün torpaq sahəsinin plan və ölçüsü sənədi hazırlanmalı və Dövlət Torpaq Kadastrı kitabında qeydiyyata alınmalı idi. Ona görə biz fiziki şəxsin heç bir günahı ola bilməz. Bu gün bu işi DTXK-nin əvəzinə DƏK-in Qəbələ 9 saylı Ərazi Reyestr İdarəsi tərəfindən həyata keçirilə bilərdi. Amma bizə formal və əsassız cavab yazmaqla işləini bitmiş hesab edir.

Hörmətli cənab Prezident!

Bir daha xatırlatmaq istəyirəm ki, bizim hazırda köhnə və təmirsiz 3 otaqlı ata yurdu hesab edilən və 90 il əvvəl inşa edilmiş heç bir şəraiti olmayan evimizdə son 28 ildə bizim ailəyə dövlət tərəfindən heç bir imtiyaz tətbiq edilməyib. Nə bir avtombil, nə bir mənzil, nə bir iş, nə pul mükafatı, nə bayram günlərində hətta Heydər Əliyev Fondunun təşkil etdiyi yardımlardan yararlanmamışıq. İstədiyimiz tək bir mənzil problemini həll etmək üçün bizim adımıza verilən bu 0.2 ha torpaq sahəsidir ki, onu da sənədləşməsinə imkan verilmir, yerli bələdiyyə isə özbaşına bu yerimizi 2 nəfərə hər birinə 10 sot olmaqla satıb mənimsəyib. Ona görə bu torpağımızı bizə sənəd üzrə verə bilmirlər. Bu torpağı sənədləşdirə bilsəydik, ev tikmək barədə düşünərdik. Nə yazıq ki, yerli bürokratlar biz şəhid ailəsinə nəinki kömək etmək, heç maraqlanmayıbar. Son araşdırma zamanı o da məlum oldu ki, uzun müddət Bum Bələdiyyəsinin sədri şəhid atası kimi atama 1997-ci ildə rəsmi ayrılmış bu yerin 10 sotunu öz oğlunun, digər 10 sotunu isə digər imkanlı şəxsə satdı. Yerli əhalinin verdiyi məlumatlardan o da məlum oldu ki, Bum kəndi ərazisində nə qədər bələdiyyəyə ayrılan yaxşı yerlər var, hamısını öz yaxın qohum-əqrəbalarının adına saxta sənədlərlə alqı-satqı edib özü yiyələnib. İndi bazar açıb baha qiymətə kənar fiziki şəxsxlərə satmaqla məşğuldur. İş o yerə çatıb ki, hətta vəfat edən atasının da adına arxa tarixlə alqı-satqı müqaviləsi, qərar, torpağın plan və ölçüsü sənədləşdirsə də, banka ödənilən rüsum pulunun arxa tarixinə sənəd düzəldə bilməyib. Eləcə də digər bacısının, qardaşının, xalasının, əmisinin, dayısı oğullarının, bir sözlə, bütün qohumlarının adlarına yerlərin hamısını əsassız olaraq zəbt edib. 1997-ci ildə biz şəhid ailəsinə ayrılan 20 sot torpaq sahəsini də baha qiymətə satmaq üçün oğlunun adına rəsmiləşdirib. İndi də bəhanə edir ki, get gözlə, sənin yerini başqalarına vermişəm, gərək onlardan alan pulu qaytaram, sən gərək 2000 manat verəsən ki, mən bu sənədləşməni həyata keçirim və s. boş-boş sözlərlə məni yola verməklə məşğuldur.

Hörmətli cənab Prezident!

Çox xahiş edirik ki, yerli bələdiyyə sədrinin son 15 ildə törətdiyi qanun pozuntularının araşdırılmasına göstəriş verə və bizə 1997-ci ildən ayrılmış 0.2 ha torpaq sahəsidən istafadə etməyimiz üçün yerli aidiyyəti qurumlar tərəfindən süründürməçiliyə salınmadan tələb edilən sənədləşmənin aparılmasına göstəriş verəsiniz. Axı bu torpağa mənim şəhid qardaşımın qanı axıdılıb. Və bizim 9 nəfərlik ailəmizin mənəvi haqqı çatır ki, bu yerə sahiblik edək. Yerli bələdiyyə sədrinin bütün torpaqları qanunsuz olaraq zəbt edib öz adlarına sənədləşdirdiyi qohum-əqrəbassından heç kəs nə 1-ci, nə də 2-ci Qarabağ müharibəsində iştirak edən olmayıb".

Şikayətlə bağlı bütün maraqlı tərəflərin mövqelərini dərc etməyə hazırıq.

Geri qayıt