İsrail ordusu İordan çayının qərb sahilində 33 fələstinlini saxlayıb

İsrail ordusu İordan çayının qərb sahilində gecə reydləri zamanı terror fəaliyyətlərində iştirak etməkdə şübhəli bilinərək axtarışda olan 33 fələstinlini saxlayıb, onlardan 20-si HƏMAS hərəkatının tərəfdarıdır.

Bu barədə İsrail Müdafiə Ordusunun mətbuat xidməti məlumat yayıb.

“Gecə İudeya və Samariyada (İordan çayının qərb sahili - red.) təhlükəsizlik qüvvələri axtarışda olan 33 şəxsi saxlayıb, onlardan 20-si HƏMAS terror təşkilatının tərəfdarıdır”, - deyə məlumatda bildirilir.
Mətbuat xidmətinin verdiyi məlumata görə, ümumilikdə, oktyabrın 7-dən İsrail hərbçiləri İordan çayının qərb sahilində 1 750 fələstinlini, o cümlədən 1 050 HƏMAS tərəfdarını saxlayıblar.

Mənbə: TASS