Ulu Öndər Heydər Əliyevin gənclər siyasəti

Ötən əsrin 90-cı illərinin əvvəllərində dünyada, o cümlədən Azərbaycanda baş verən ictimai-siyasi hadisələr gərginləşdikcə, gənclər qarşısında duran problemlər artmağa və onların həlli yolları da çətinləşməyə başladı. 1993-cü ildə xalqın tələbi ilə hakimiyyətə gələn ümummilli liderimiz Heydər Əliyev gənclərin üzləşdiyi problemləri görür və xalqın sağlam, xöşbəxt gələcəyinin təmin edilməsi, yeniyetmə və gənclərin savadlı, sağlam bir vətəndaş kimi yetişmələri üçün gənclər siyasətinin düzgün qurulmasının və ağır ictimai-siyasi vəziyyətə baxmayaraq onlara diqqətin artırılmasının vacibliyini bilirdi. Bu məqsədlə 1994-cü il iyulun 26-da Gənclər və İdman Nazirliyi yaradıldı. Nazirlik yaradıldıqdan sonra dövlət gənclər siyasəti sahəsində mühüm işlər həyata keçirməyə başladı. Bu siyasətin davamı olaraq 1996-cı il yanvarın 26-da Ulu Öndər Heydər Əliyevin imzaladığı Sərəncama əsasən, fevralın 2-də Azərbaycan Respublikası gənclərinin ilk forumunun keçirilməsi qərara alındı. Bu forumun keçirilməsi ilə dövlət siyasətində gənclərə diqqət, qayğı daha da artırıldı. Forum müstəqil Azərbaycan Respublikasının gəncləri qarşısında duran mühüm vəzifələrin həyata keçirilməsində ölkə gənclərinin hər bir sahədə fəal iştirak etməyə hazır olduğunu nümayiş etdirdi və gənclərlə işin nəzərəçarpacaq dərəcədə canlanmasına səbəb oldu.
Ulu Öndər tərəfindən 2 fevral 1997-ci il tarixində imzalanmış Sərəncama əsasən fevralın 2-si Azərbaycan Gəncləri Günü elan edilib. Həmin vaxtdan etibarən bu gün MDB məkanında və Şərqi Avropa ölkələri arasında ilk dəfə olaraq Azərbaycanda Gənclər Günü təntənəli şəkildə qeyd edilməyə başlanıb.
 Ümummilli Lider Heydər Əliyev hər bir zaman Azərbaycan gəncliyinə inandığını, güvəndiyini  bildirir  və gənclərə etimad göstərirdi.  Bu gün ölkəmizdə gənclər siyasəti mahiyyət və keyfiyyətcə yeni mərhələsini yaşayır. Prezident İlham Əliyev Ulu Öndərin gənclər siyasətinə sadiqliyini öz qərarları ilə təsdiq edir. Gənclərin mənəvi inkişafı, vətənpərvərlik tərbiyəsi, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində görülən işlər, gənclər təşkilatlarının formalaşması və inkişafı üçün yaradılan şərait və imkan bu sahəyə böyük diqqətin nəticəsidir.
 27 sentyabr 2020-ci ildə başlayan və qəhrəman ordumuzun, Müzəffər Ali Baş Komandanımızın  səyi,  xalqımızın birliyi nəticəsində 44 gündə Şanlı Qələbə ilə bitən  Vətən müharibəsində gənclərin rolu həlledici olmuşdur. Bu da Ulu Öndərin gənc nəsli Azərbaycanın uğurlu sabahı naminə səfərbər edən siyasətinin nəticəsi idi. Bu gün Azərbaycan xalqı Vətən müharibəsində iştirak etmiş, canını fəda etmiş, hər bir igid gəncinə , hər bir əsgərinə minnətdardır.  Vətən uğrunda, torpaq uğrunda şəhid olan, qazi olan igidlərimizin  əksəriyyəti gənclər idi. Bu, hər birimiz üçün qürur mənbəyidir.

Könül Əfəndiyeva – YAP üzvü