Jurnalistlər Evlərinin qanunsuz sakinləri köçürüləcək – YENİ İDDİALAR

Jurnalistlər Evlərinin qanunsuz sakinləri köçürüləcək – YENİ İDDİALAR Ötən il Bakının Səbail rayonunda 16 mərtəbəli iki Jurnalistlər Evinin sakinləri mənzil əldə etmələrinin qanuniliyi haqqında ifadə vermək üçün Baş Prokurorluğa dəvət edilmişdilər. Jurnalistlər özləri və prezidentin fərmanı ilə pulsuz mənzil alan digər sakinlər haqqında suallara cavab veriblər. Yanvarın 15-də Baş Prokurorluğun iki evin tikintisinə və mənzillərin paylanmasına görə məsul olan KİV-in İnkişafına Dövlət Dəstəyi Fondunun keçmiş icraçı direktoru Vüqar Səfərlinin və Portos MMC-nin direktoru Nadir Məhərrəmovun həbsi haqqında rəsmi məlumat dərc etməsindən göründüyü qədər, təhqiqat başa çatıb. Onlar 2013-2019-cu illərdə mətbuatın ehtiyacları üçün ayrılmış altı milyon manatdan çox dövlət vəsaitini mənimsəməkdə, habelə digər qanun pozuntularında ittiham olunurlar.

Həmin rayonda jurnalistlər üçün üçüncü yaşayış evi 2020-ci ildə tikilib və hələ məskunlaşmayıb. “Mən birinci binada yaşayıram, burada prinsipcə hər şey normaldır, baş redaktorlara mənzilləri müsabiqəsiz, şəxsən prezidentin adından veriblər. İkinci bina ilə bağlı fırıldaqlar olması, mənzillərin jurnalistlərə deyil, məsul məmurların qohumlarına, yaxınlarına, katibələrinə verilməsi barədə şayiələr var. Hətta geri qaytarmaq şərtilə. Ötən il ikinci evin sakinlərinin əksəriyyəti prokurorluğa dəvət ediliblər və ifadə veriblər”, deyə bu evdə yaşayan jurnalistlərdən biri Turan-ın sualına cavabda bildirib.

“Yayda məni bir dəfə Baş Prokurorluğa çağırdılar. İndi, yəqin ki, 15-20 sakini çağıracaqlar”, deyə ikinci Jurnalistlər Evində mənzil alan digər jurnalist bildirib.

Hər ikisi sualları anonim qalmaq şərti ilə cavablandırıblar.

"Bakupost.az"saytı iki gün əvvəl prezidentdən hədiyyə almaq üçün qanuni əsası olmayan 20 nəfərin mənzil aldığını üzə çıxardığını yazıb. Mənzil alanlar siyahısına yenidən baxılacağı gözlənilir, qanunsuz sakinlər binalardan çıxarılacaqlar.

Jurnalistlər Fərqanə Allahverdiqızı, Elnurə Abışova və digərləri FB-də aşkar edilmiş 20 pozuntunun çox az olduğu, qanunsuz mənzil alanların əslində daha çox olduğu barədə replikalar paylaşıblar. İkinci evdə mənzillərin təxminən yarısı kirayə verilir, yəni bu mənzilləri alanların onlara ehtiyacı yoxdur, deyə jurnalistlər bildiriblər.

F.Allahverdiqızı: “İkinci binada mənzillərin yarısından çoxu qanunsuz yolla hədiyyə olaraq alınıb. Araşdırma dərinləşdirilməlidir”.

Rumiyyə Miraslan birinci evdə jurnalist Fariz Vəliyevə ayrılmış mənzillə bağlı biabırçı hadisədən bəhs edir. 2017-ci ildə mənzili alan şəxs xərçəngdən dünyasını dəyişib və həmin vaxt Səfərli onun üçotaqlı mənzilini mənimsəyib.

Baş Prokurorluqdan Turan-ın sorğusuna cavabda bildiriblər ki, istintaqın davam etməsi ilə əlaqədar məlumat verə bilmirlər.

Turan-ın mənbələri mənzil paylanarkən KİV-ə Dövlət Dəstəyi Fondu tərəfindən müəyyən edilmiş KİV-də 3 (gündəlik qəzetlər), 6 (sayt və agentliklər) və 10 (televiziya və radio) və daha artıq iş stajı olan jurnalistlərin mənzil almaq hüququ haqqında qaydanın pozulduğunu bildirirlər. Əslində heç vaxt KİV-də işləməyənlər belə mənzil alıblar. Həmçinin, məhkumluğu və Mətbuat Şurasından töhməti olan jurnalistləri prezidentin hədiyyəsini almaq hüququndan məhrum ediblər.
Geri qayıt