“Elə şortikli qızlar var ki, “abırlı” geyinən qadınlardan qeyrətlidir” - Şeyxin qudası

“Elə şortikli qızlar var ki, “abırlı” geyinən qadınlardan qeyrətlidir” - Şeyxin qudası Bakı metrosunda şortikli qıza hücum olunması son günlər müzakirə olunan əsas mövzulardan biridir. Sosial şəbəkələrdə yayılan videodan belə aydın olur ki, bir cavan oğlan üzbəüzündə oturmuş şortikli qızın geyiminə və oturuşuna irad bildirir və sərt cavab alır. Sonra söhbətə yaşlı bir qadın qarışır və münaqişə yaranır.

Bəs görəsən bu cür məsələlərin ictimailəşməsi, ictimai maraq kəsb etməsi nədən qaynaqlanır və bunun hansı fəsadları ola bilər?

AZXEBER.COM məsələ ilə bağlı Milli Məclisin deputatı Vahid Əhmədovu və Milli Məclisin sabiq deputatı Hacı Qalibi danışdırıb.

Portalımıza açıqlamasında millət vəkili Vahid Əhmədov bildirib ki, bu cür olayların mətbuatda tirajlanması yolverilməzdir:

"Heç şübhəsiz bu cür informasiyaların yayılması onsuz da əsəbləri gərgin vəziyyətdə olan soydaşlarımıza mənfi enerji ötürür. Nəzərə almaq lazımdır ki, kənar təsirlərə məruz qalan insanlar kifayət qədərdir və onlar bu cür hadisələrin mənfi təsirlərinə daha tez uyurlar. Biz nəinki bu cür xəbərləri yaymamalıyıq, əksinə imkan verməməliyik ki, gənc nəslin tərbiyəsinə ciddi ziyan vuracaq bu cür hallar ictimailəşsin. Bu mənada mən son günlər "şortikli qız”la bağlı xəbərlərin yayılmasını qəti şəkildə pisləyirəm”.

"Hər kəsin öz şəxsi həyatı var və heç kim buna qarışa bilməz” deyən millət vəkilinin sözlərinə görə, bu məsələdə təkcə valideynləri günahlandırmaq olmaz:

"Düzdür, valideynlər öz övladlarının, xüsusən qız övladlarının milli-mənəvi dəyərlərə bağlı olmasına çalışmalıdır, buna səy göstərməlidir. Çünki bizim öz milli mentalitetimiz var. Lakin bəzən insanlar elə vəziyyətlə üzləşirlər ki, öz övladlarına söz keçirə bilmirlər. İstənilən halda hər bir gənc həm öz valideynlərinə, həm də yaşadığı cəmiyyətin formalaşmış ənənələrinə hörmətlə yanaşmalıdır. Çox təəssüf edirəm ki, bu cür hallar baş verir”.

Milli Məclisin sabiq deputatı Hacı Qalib hesab edir ki, insana geyiminə görə qiymət vermək olmaz:

"Biz tez-tez Avropada oluruq. Orada nəinki gənc qızlar, bəzən yaşlı arvadlar da şortik geyinir. Bu o deməkdir ki, onlar pis yoldadır?! Bu qətiyyən belə deyil. Elə şortikli qızlar var ki, "abırlı” geyinən qadınlardan daha qeyrətlidir. Hər kəsin öz namusu, öz qeyrəti var. Bu cür məsələlər həssas məsələlərdir və belə məsələlərə ehtiyatla yanaşmaq lazımdır. Axı o hələ gənc qızdır və onun gələcəyi var. Sən hansı haqla onun videosunu yayır və cəmiyyət arasında biabır etməyə çalışırsan?! Mən bir ağsaqqal kimi, üzümü gənclərə tutub demək istəyirəm ki, milli mənəvi dəyərlərə bağlı olsunlar. İmkan verməsinlər ki, xırda səhvlərinə görə, onları ittiham etsinlər, özlərini və valideynlərini hədəfə gətirsinlər”.
Geri qayıt