“Ramiz müəllimin dediyi nöqsanlar olub” - Komitə sədrinin 1-ci müavini Nazim İbrahimovu təkzib etdi

“Ramiz müəllimin dediyi nöqsanlar olub” - Komitə sədrinin 1-ci müavini Nazim İbrahimovu təkzib etdi Prezident Administrasiyasının rəhbəri, akademik Ramiz Mehdiyev Diasporla İş üzrə Dövlət Komitəsinin yeni sədrinin təqdimatında sabiq sədr Nazim İbrahimovu sərt tənqid edib.

"Diasporla İş üzrə Dövlət Komitəsinin işində narazılıqlar var idi, komitənin sədri Nazim İbrahimov öz vəzifəsinin öhdəsindən layiqincə gələ bilməyib. Təbii ki, bütün bunlardan prezident İlham Əliyevin də məlumatı var. Buna görə də, prezident Nazim İbrahimovun işdən azad edilməsi barədə sərəncam verib. Nazim İbrahimov rəhbərliyi dövründə nə Gürcüstanda, nə Avropa ölkələrində, nə də orta Asiya ölkələrində yaşayan azərbaycanlılarla hnasısa iş görülüb. Düzdür, komitədə müəyyən beynəlxalq tədbirlər keçirilib, amma konkret işlər görülməyib. Müəyyən tədbirlərin həyata keçirilməsində dövlət tərəfindən ayrılan maliyyə yardımları da öz ünvanına çatmayıb”-deyə Ramiz Mehdiyev bildirib.

Məsələ ilə bağlı Diasporla İş üzrə Dövlət Komitəsi sədrinin birinci müavini Valeh Hacıyev Modern.az-a açıqlama verib.

Valeh Hacıyev bildirib ki, iş olan yerdə nöqsan da olur.

“Amma biz çalışırıq ki, nöqsanlar çox aşağı səviyyədə olsun. Nöqsanların həcmi çox az olsun. Amma iş olan yerdə nöqsan da olur. Yəqin ki, Prezident Administrasiyasının rəhbəri Ramiz müəllimin dediyi nöqsanlar olub. Amma bu illər ərzində Diasporla İş üzrə Dövlət Komitəsi olraq ölkə başçısının, dövlətimizin xarici siyasətində atdığı addımlarda, qəbul etdiyi qərarlarda həmişə iştirak etmişik. Hesab edirəm ki, yeni sədrin rəhbərliyi ilə də uğurlara imza atacağıq və olan nöqsanları da aradan qaldıracağıq”.
Geri qayıt