SON DƏQİQƏ
XalqXeber.Az » Sosial » “Ərzaq məhsullarının tədarükü və təchizatı” ASC -də fəhlələr əmək haqqı ala bilmir

“Ərzaq məhsullarının tədarükü və təchizatı” ASC -də fəhlələr əmək haqqı ala bilmir

Tarix:

22-06-2018, 10:39

/ 1 574 dəfə oxundu.
“Ərzaq məhsullarının tədarükü və təchizatı” ASC -də  fəhlələr əmək haqqı ala bilmir

“Körpə balalarımı kənddə erməni ilə ilə üz-üzə qoyub ASC-nin qapılarında qalmışam. Zəhmət haqqımı tələb etdiyim üçün gah təhqir olundum, gah da hücuma məruz qaldım”.

Bu sözləri redaksiyamıza üz tutan şikayətçi Tovuz rayonu Əsrik Cırdəxan kəndinin sakini Etibar Alıyev deyir. O bildirir ki, artıq neçə aylardır “Ərzaq məhsullarının tədarükü və təchizatı” ASC-dən nə özünün, nə də rəhbərlik etdiyi briqadanın fəhlələrinin əmək haqqını ala bilmir: “Mən 2017-ci ilin may ayından etibarən Tovuz rayonu Kürçayı sahilində Azərbaycan Respublikası “Ərzaq məhsullarının tədarükü və təchizarı” ASC-nin əməkdaşları Vəli Əmirov və özünü sədr müavini kimi təqdim etmiş (meyvəli bazarının direktoru) Anar Novruzovun sifarişi əsasında 7 (yeddi) ədəd müasir standartlara uyğun istixana kompleksi ,böyük həcmli anbar binası, yeməkxana binası, su hovuzunun bünövrəsi, 3 (üç) km-dən çox geniş zolaqlı avtomobil yolu və mühafizə səngərinin tikintisini gerçəkləşdirən 60 (altmış) nəfərdən çox tikinti-quraşdırma briqadasına rəhbərlik eləmişəm. Ümumilikdə 332 572 manat məbləğində tikinti-quraşdırma işləri görülüb. Bu işlərdən də fəhlələrə 35 892 manat məbləğində əmək haqqı borcu qalmışdı. Amma ASC əməkdaşları müxtəlif bəhanələr gətirərək bu məbləği ödəməkdən imtina edirlər”.

“Dazbaşları töküb səni ölənədək döydürəcəyik”

Şikayətçi deyir ki, həmin məbləği tələb etdiyi üçün onun başına olmazın oyunları gəlib: “Haqqımızı tələb etdiyimə görə, sədr müavini Anar Novruzovla oranın əməkdaşı Nazim Məmmədov mənə dedilər ki, “sən bizdən bu borcu tələb edə bilməzsən, əgər susmasan, dazbaşları töküb səni ölənədək döydürəcəyik, lazım gəlsə, həbsə atdıracayıq, bizə heç heç nə eləyə bilməz. Nazim Məmmədov deyir ki, bura mən uzun müddət hüquq-mühafizə orqanlarında işləmişəm, səni şərləyib döydürüb, sonra haqqında cinayət işi qaldıracayıq”.

E.Alıyev bildirir ki, onlara çatacaq məbləğin ödənməməsi üzündən birgə çalışdığı fəhlələrlə də arasında gərginlik yaranıb: “Mən Bakıya əmək haqqı borcunu almağa gəldiyim vaxt fəhlələr evimə hücum eləyiblər. Tez-tez söyüş dolu telefon zəngləri almışam. Üstəlik ASC-əməkdaşları da məni hədələdikdən sonra ağır stress keçirdim, səhhətim ağırlaşdı, klinik ölüm həddinə gəldim”.

Daha sonra o, məsələ ilə bağlı daha yuxarı instansiyalara- Respublika prezidenti İlham Əliyevə, Birinci vitse-prezident Mehriban xanım Əliyevaya, Respublika Baş Prokurorluğuna və millət vəkili Qənirə Paşayevaya müraciət edib: “Çox ciddi mübahisə və münaqişələrdən sonra ASC-nin əməkdaşları qalıq borcun 16000 (on altı min) manatını verdilər. Mən də bu məbləğlə 38 fəhlənin əmək haqqını ödədim. Amma qalan məbləğ ödənmədi”.

“Şərtimizə əməl et, əmək haqqını ödəyək”

Şikayətçi iddia edir ki, düşdüyü çətin və gərgin vəziyyətdən istifadə edərək ona iltizam yazdırıblar: “Mən qalan borcla bağlı təkrar cənab Prezidentə, Birinci Vitse Prezidentə , “Ərzaq məhsullarının tədarükü və təchizarı” ASC-nin sədri Əbülfət Qocayevə və Daxili İşlər Naziri cənab Ramil Usubova teleqramlar ünvanladım. Teleqramlardan sonra ASC-nin əməkdaşları və Anar Novruzov məni çağıraraq dedilər ki, vurduğun teleqramlar respublikanı ayağa qaldırıb. Sənin əmək haqqı borcunuzu biz bütünlükə ödəyəcəyik, amma bir şərtimiz var, gedib Əmək və Əhalinin Sosial Müdafiəsi Nazirliyinin əmək müfəttişliyinə izahat verməlisən ki, qalıq əmək haqqı borcunu almısan, şikayətin araşdırılması dayandırılsın.. Bundan sonra onlar mənə əmək haqqı borcunun 8200 (səkkiz min iki yüz) manatını verdilər. Mən o məbləğlə də fəhlələrin qalıq əmək haqqını bir hissəsini ödədim. Hazırda ASC-nin biz fəhlələrə 11692.45 (on bir min altı yüz doxsan iki 0. 45) manat qalıq əmək haqqı borcu qalıb ki, onu da ödəməkdən qəti şəkildə boyun qaçırırlar. Onlar məni aldadaraq çox çətin duruma saldılar. Mən onların məbləği ödəyəcəklərinə inanıb izahat yazdım. Amma onlar məni aldatdılar, borcu tam vermədilər. Hazırda 11692.45 (on bir min altı yüz doxsan iki) manat məbləğində borc öhtəliyi mənim üzərimdə qalıb”.

“ASC əməkdaşlarından imtina edir?”

Şikayətçi deyir ki, ASC-nin onlara təqdim etdiyi sənədlərdə isə tamam başqa mənzərə ortaya çıxır.

Belə ki, 13.02.20018-ci ildə verilmiş sənəddə “Həmin ərazidə tikilən istixana kompleksi, anbar və digər tikililərin Cəmiyyətlə heç bir əlaqəsi yoxdur. Belə ki, həmin tikililərin inşası ilə bağlı Cəmiyyət tərəfindən heç bir sifariş verilməyib, E.Alıyev, nə də digər şəxslərlə əmək müqaviləsi imzalanmayib” sözləri qeyd olunub.

Digər- 23.04.2018-ci ildə verilən sənəddə isə şikayətçinin adlarını çəkdiyi şəxslərin ümumiyyətlə ASC-də çalışmadığı bildirilib. Şikayətçiyə də məsələ ilə bağlı məhkəməyə müraciət olunması tövsiyə edilib.

Şikayətçinin əlaqədar qurumlardan həm də buna aydınlıq gətirilməsini istəyir: “Prezidentə göndərdiyim tleqram və müraciətlərimdən sonra ASC məsuliyyəti öz üzərindən atmaq üçün bizə fərqli məzmunda məktub göndərdi. Məktubda yazdılar ki, guya tikililəri onlar sifariş verməyib, heç bir şəxslə əmək və podrat müqaviləsi də bağlamayiblar. Halbuki, biz bütün sifarişləri və sərəncamları ASC-nin əməkdaşlarından almışıq”.

Şikayətçi deyir ki, əmək müqaviləsinin bağlanması üçün adıçəkilən şəxslərə çox israr edib. Amma onlar heç kəslə əmək və ya podrat müqaviləsi bağlamadıqlarını deyiblər: “Onlar mənə dedilər ki, sən fəhləsən, get, işini gör. Hər şeyi özümüz həll edəcəyik. Müqavilə də bizlikdir, vergi də...”

“Məni ASC-nin qapısından içəri buraxmırlar”

E.Alıyev məsələ ilə bağlı ASC-nin rəhbəri Əbülfət Qocayevlə də görüşməyə çalışıb: “Məni ASC-nin qapısından içəri keçməyə qoymurlar. Hər dəfə qapıdakı polis qabağımı kəsib deyir ki, sən ASC-dən şikayət eləmisən, içəri girə bilməzsən. Düşünürəm ki, bizim əməhaqqımızı kəsənlər yəqin sədrə də yanlış məlumat veriblər. Məsələdən onun xəbəri yoxdur. Mənə deyirlər ki, sədrlə görüşmək üçün Anar Novruzovdan icazə almalısız. Mən anlamıram, sədrlə görüşə bilmirəm, şikayətimizi araşdıran, məhəl qoyan yoxdur. Biz nə eləmişik? Adam öldürməmişik, cinayət eləməmişik. Zəhmətlə çalışmışıq, indi də halal əməhaqqımızı, alın tərimizin pulunu istəyirik”.

E.Alıyev qəzetimiz vasitəsilə bir daha prezident İlham Əliyevə səslənərək onlara yardım etməsini xahiş edir: “Cənab Prezident! Halal zəhmətiylə çörək qazanan insanların haqqını almanıza yardımçı olmanızı rica edirəm. Bu məsələdə yeganə sizə ümid bəsləyirəm. Biz fəhlələrin 11692 manat məbləğində qalıq əmək haqqının mənimsənməsinə icazə verməyin”.

Sözügedən məsələdə adı çəkilən şəxslərdən öncə Anar Novruzovla əlaqə saxlamaq istədik. Təəssüf ki, o, telefonlarımızı cavablamadı.

Daha sonra Vəli Əmirovu aradıq. O, isə sözügedən məsələ haqda suallarımızı belə cavabladı: “Etibar Alıyevin dediyi məsələnin Ərzaq Məhsullarının Tədarükü və Təchizatı Açıq Səhmdar Cəmiyyətinə heç bir aidiyyatı yoxdur. Sadəcə, vaxtilə bizim cəmiyyətin işçisi olan fiziki şəxs, kənar bir adam kimi orda fabrik qurmaq istəyirdi, orda bəzi problemlər vardı. O problemlə əlaqədar mən də gedib o şəxsi də, şikayətçi Etibar Alıyevi də çağırıb məsələni həll etmişəm”.

“Həmin adam kimdir” sualına cavab olaraq cəmiyyət təmsilçisi bunları dedi: “O Natiq Hacıyev adlı şəxsdir. Hazırda o şəxs Azərbaycanda yoxdur. Mən regional idarələrin kurartoru kimi bu məsələ ilə bağlı Tovuza getmişəm, həm Etibar Alıyevi, həm də o şəxsi çağırıb məsələ ilə bağlı söhbət eləmişəm. Sadəcə,istəmədim ki, bizim regional idarənin adı hardasa hallansın. Ona görə də o vaxt Tovuza, maraqlandım. Ona da dedim ki, Etibar, narahat olma, sənin bu adamda bir manat pulun qalmayacaq. Elə də oldu. Problem həll olundu, qurtardı. İndi bu işin mənə aidiyyatı yoxdur. Ondan sonra oranı kim tikdirib, kim işlədib, onun bizə, Səhmdar Cəmiyyətə heç bir aidiyyatı yoxdur”.

V.Əmirov dedi ki, nə Natiq Hacıyevin, nə də başqasının E.Alıyevə bir manat borcu qalmayıb: “O borcların hamısı ödənilib, Natiq Hacıyev sonradan oranı kimə verib, kim tikib, mən bilmirəm. Yenə də deyirəm, nə başlanğıcda, nə də sonra bu adamın, o tikililərin bizim cəmiyyətə aidiyyatı olmayıb. Sadəcə, o adam bizim cəmiyyətdə regional idarənin rəisi işləyirdi. O da bəzi məsələlərə görə ərizəsini yazıb çıxdı getdi”.

“E.Alıyevə ASC-dən verilən sənəddə şikayətçinin adının çəkildiyi şəxslərin orda çalışmadığının qeyd olunmasına isə V.Əmirov belə münasibət bildirdi: “Mən ASC-nin əməkdaşıyam. O işin mənə aidiyyatı olmadığı üçün belə cavab verilib”.

E.Alıyevin Anar Novruzovla onun hədələnməsinə gəlincə, ASC təmsilçisi bunu tamamilə təkzib etdi: “Bunlar yalan, böhtan və şərdir. Belə bir şey olmayıb”.
Hurriyyet.org
“Ərzaq məhsullarının tədarükü və təchizatı” ASC -də  fəhlələr əmək haqqı ala bilmir
“Ərzaq məhsullarının tədarükü və təchizatı” ASC -də  fəhlələr əmək haqqı ala bilmir
“Ərzaq məhsullarının tədarükü və təchizatı” ASC -də  fəhlələr əmək haqqı ala bilmir

Şərhlər

XƏBƏR LENTİ