23.04.2014 14:12

Ümid partiyası bəyanat yaydı

Müasir dünyada baş verən mürəkkəb və ziddiyyətli geosiyasi proseslər Azərbaycan dövlətindən milli və qlobal maraqlar naminə qətiyyətli seçim etməyi tələb edir.

 

Ümid partiyası oktyabrın 18-də bir qrup jurnalist və incəsənət xadimi tərəfindən Azərbaycan prezidenti İlham Əliyevə ünvanlanan müraciətdən dərin təəssüf hissi keçirdiyini bildirir və  bir mənalı olaraq qeyd edir ki, belə müraciətlər  dövlətimizin nəinki milli maraqlarına uyğun deyil, əksinə daban-dabana ziddir. Azərbaycan heç bir halda dövlətin müstəqilliyinə və suverenliyinə xələl gətirə biləcək birliklərdə yer almamalıdır.

Müstəqilliyimizə və suverenliyimizə təhdidlərin və təhlükələrin bu gün də aktual olduğunu nəzərə alan Ümid partiyası hesab edir ki, Azərbaycan dövləti strateji seçiminə sadiq qalaraq, demokratik dəyərlərə söykənən, qanunun aliliyi və beynəlxalq hüququn üstünlüyü prinsipini qəbul edən Avro- Atlantik məkana inteqrasiya siyasətini davam etdirməli və bu istiqamətdə üzərinə götürdüyü bütün öhdəlikləri yerinə yetirməlidir. Xüsusilə də Avro-Atlantik məkanın mühüm strukturlarından  olan Avropa Birliyi ilə “ Şərq Tərəfdaşlığı ” çərçivəsindəki əməkdaşlıq genişləndirilməli və bu ilin noyabr ayının 25 - 26 -da Vilnüs şəhərində keçirilən növbəti “ Şərq Tərəfdaşlığı ” sammitində bu qurumla Assosiativ üzvlük haqqında saziş imzalamalıdır. Hesab edirik ki, assosiativ üzvlük haqqında saziş,  Azərbaycanın Avro-Atlantik məkana inteqrasiyası prosesini sürətləndirməklə yanaşı, həm də ölkəmizin demokratikləşməsi üçün yol xəritəsi funksiyasını oynayacaq.  Azərbaycan vətəndaşlarının Avropa Birliyinə üzv ölkələrə gediş-gəlişinin sadələşməsinə təminat verən bu saziş, Avropa dəyərlərinin çox qısa bir zamanda azərbaycanlıların da yaşam və həyat tərzinə çevrilməsi üçün əvəzsiz bir imkandır.

Ümid Partiyası Azərbaycan hakimiyyətini bütün bu reallıqları və dövlətin milli maraqlarını nəzərə alaraq bu istiqamətdə qətiyyətli mövqe tutmağa çağırır və bəyan edir ki, Avro-Atlantik məkana inteqrasiya siyasəti dövlətimizin milli maraqlarına cavab verən yeganə düzgün siyasi xətdir.

Ümid Partiyasının Mətbuat Xidməti

Xəbər lenti