19.04.2014 19:40

Füzuli Ələkbərovu xarici ölkələrə sərmayə yatırmağa vadar edən səbəblər hansılardır?

ƏƏSMN rəhbəri oğlu Vüqar Ələkbərov və qardaşı Nizami Ələkbərovun Almaniyada biznes qurmaları üçün yüz milyonlarından keçməyə hazırdır

 

Oktyabrın 9-da keçirilən prezident seçkilərindən sonra hökumətdə təmsil olunan nazirlərdən bir neçəsi təşvişə düşüb. Belə ki, onlar səslərin böyük əksəriyyətini qazanan İlham Əliyevin andiçmə mərasimindən sonra vəzifələrini itirəcəklərindən ehtiyat edirlər. Hələ seçkidən bir neçə həftə əvvəl qızışan söz-söhbətlər, aparılan müzakirələrdə vəzifədən kənarlaşdırılması gözlənilən məmurların adları çəkilirdi. Heç şübhəsiz ki, onların arasında əmək və əhalinin sosial müdafiəsi naziri Füzuli Ələkbərovun adı ön sıralarda qeyd olunurdu. Seçki başa çatsa da, əmək nazirinin ətrafında yayılan söhbətlər səngimək bilmir. Əldə etdiyimiz informasiyaya görə, Füzuli Ələkbərov təşviş içindədir. Son günlər onun rəhbərliyi altında fəaliyyət göstərən qurumla bağlı şikayətlərin, neqativ halların ictimailəşməsi ölkə rəhbərliyinin məsələyə diqqətini artırıb.

Qeyd etmək yerinə düşərdi ki, bu yaxınlarda Baş Prokuror yanında Korrupsiyaya Qarşı Mübarizə İdarəsi öz hesabatını açıqlayanda şikayətlərin daha çox Əmək və Əhalinin Sosial Müdafiəsi Nazirliyindən edildiyini vurğulayıb. Ümumiyyətlə, yaxın keçmişə ekskurs etsək, nazirin fəaliyyətindəki qüsur və çatışmazlıqların şahidi olarıq. 2006-cı ildən etibarən nazir vəzifəsində çalışan «İmprotex»in sabiq rəhbəri yeddi illik fəaliyyəti dövründə Əmək və Əhalinin Sosial Müdafiəsi Nazirliyini belə desək, yanüstə qoyub. Bəzi məqamlara toxunmaqla nazirin bu müddət ərzindəki fəaliyyətini qısa şəkildə xarakterizə etmək istəyirik. Qeyd edək ki, hazırda dövlət büdcəsindən ən çox maliyyə yardımı alan nazirliklər arasında ƏƏSMN-in adı öndə gedir. Nazirliyin fəaliyyət sahəsi kifayət qədər geniş olduğundan ölkə rəhbərliyi əhalinin sosial müdafiəsinə ayrılan maliyyə yardımlarının miqdarını hər il artırır. ƏƏSMN-ə tabe olan əmək və əhalinin sosial müdafiəsi mərkəzləri, tibbi-sosial ekspert komissiyaları, Dövlət Əmək Müfəttişliyi, Dövlət Məşğulluq Xidməti və Dövlət Sosial Təminatı Xidmətində üzə çıxan nöqsanlar nazirin idarəetmə qabiliyyətinin nə dərəcədə zəif olduğunu göstərir. Nəzarət çox aşağı səviyyədə olduğuna görə ünvanlı yardımların, əlillik dərəcələrinin verilməsində kütləvi korrupsiya faktlarına rast gəlinir. Bundan başqa, əlil və şəhid ailələri üçün tikilən evlərin bölüşdürülməsində ədalət prinsipləri gözlənilmir. Bəzən isə əlil və şəhid ailəsi olmayan şəxslər nazirliyin hansısa vəzifə sahibi ilə «danışığa» girib həmin binalardan mənzil alırlar. Korrupsiyaya Qarşı Mübarizə İdarəsinin əməkdaşları nazirliyin tabeliyində olan qurumlarda mütəmadi olaraq yoxlamalar həyata keçirib, müxtəlif vəzifəli şəxsləri həbs etsə də, vəziyyət stabilləşmir. Əmək naziri rəhbərlik etdiyi bölmədəki qarışıq vəziyyəti səhmana salmaq əvəzinə, şəxsi biznesini genişləndirir, maliyyə imkanlarını yaxşılaşdırır. Mötəbər qaynaqlardan əldə etdiyimiz bilgilərdə qeyd olunur ki, nazir kürsüsündən aşağı salınacağını hiss edən Füzuli Ələkbərov seçkidən təxminən, iki ay əvvəl Bakıdakı ən bahalı obyektlərinin və villalarının bir neçəsini, həmçinin İsmayıllı və Gədəbəy rayonlarındakı imarətlərini satıb, pulunu isə xarici banklarda ailə üzvlərinin adına olan hesablara köçürüb. Mənbənin sözlərinə istinad etsək, ƏƏSMN rəhbəri vəzifəsinə qarşı olan mövcud təhlükəni qiymətləndirərək xarici ölkələrə sərmayə qoyuluşlarını çoxaldıb: «Onun Türkiyə və İngiltərədə biznesi var. Məndə olan məlumata görə, nazirin oğlu Vüqar Ələkbərov və keçmiş icra hakimi olan qardaşı Nizami Ələkbərov Almaniyada avtomobil biznesinə başlamaq qərarına gəliblər. Nazirin ailə üzvlərinin Almaniyanın hansı şəhərində yaşadıqlarını dəqiq deyə bilməsəm də, avtomobil biznesinin Hamburq şəhərində qurulacağı, burda böyük zavodun tikiləcəyi deyilir. Alman mütəxəssislərin hesablamalarına əsasən, avtomobil istehsalı ilə məşğul olan zavodun işə salınması üçün yüz milyonlarla avro vəsait lazımdır. Yəqin nazirin bu qədər imkanı var ki, belə fikrə düşüb. Maraqlı cəhət ondadır ki, nazir milyonları hansı yollarla qazanıb. Yuxarı orqanlar bunu araşdırsalar, qaranlıq mətləblərə aydınlıq gəlmiş olardı».

Məsələ ilə bağlı qarşı tərəfin də münasibətini öyrənə bilərik.

 

Elgün Sədalı

Xəbər lenti