SON DƏQİQƏ
XalqXeber.Az » Gündəm » “Aqua Agro”da sensasiya: Çovdarovun kürəkəninin milyonluq biznesi çökdü

“Aqua Agro”da sensasiya: Çovdarovun kürəkəninin milyonluq biznesi çökdü

Tarix:

21-02-2017, 00:04

/ 1 836 dəfə oxundu.
“Aqua Agro”da sensasiya: Çovdarovun kürəkəninin milyonluq biznesi çökdü

Həbsdə olan MTN generalı, sahibkarlara “divan tutmuş” Akif Çovdarovun kürəkəninin milyonluq biznesi çöküb

Məlumata görə, odioz generalın qızı Aidanın həyat yoldaşı Rövşən Qasımovun balıqçılıq təsərrüfatı işi müflis olub. Generalın kürəkəni “Aqua Agro” MMC-nin direktorudur.

Qayınatasının həbsindən sonra iş adamı iflas edib və layihəsi batıb. R.Qasımov MTN hadisələrinin baş verəcəyini ağlının ucundan da keçirməyib.
MTN kimi qüdrətli bir strukturda ikinci adam olan Çovdarovun kürəkəni arxayın imiş ki, hər şey istədiyi şəkildə davam edəcək. Amma qəflətən hadisələrin axarı dəyişib və generalın kürəkəni həbsdən yaxasını güclə qurtarıb.

R. Qasımov ifadəsində göstərib ki, “Aqua Agro” MMC-nin direktorudur. Həmin MMC-ni təsis etməkdə məqsəd Abşeron rayonu Masazır qəsəbəsi, Şuşa qaçqın şəhərciyinin arxasında yerləşən “Bəhrə 2010” MMC-yə məxsus istilikxanaların arxa tərəfində balıqçılıq təsərrüfatı yaratmaq olub.

Bu məqsədlə Masazır bələdiyyəsindən 99 il müddətinə 2 hektar torpaq sahəsi icarəyə götürüb. “Aqua Agro” MMC 26.09.2013-cü ildə qeydiyyata alındıqdan sonra həmin ərazidə tikintiyə başlayıb və 2015-ci ilin yayında tikintini yekunlaşdırıb.

Lakin qayınatası Akif Çovdarov həbs edildiyindən və sonuncunun kürəkəni kimi kredit almaq üçün Sahibkarlığa Kömək Milli Fonduna müraciət etməkdən utandığından həmin tikili üçün heç bir avadanlıq ala bilməyib. Həmin tikiliyə təxminən 500-600 min manat arası vəsait sərf edilib.

Məlumata görə, MTN generalının kürəkəni Fondun rəhbəri Şirzad Abdullayevə müraciət etmiş olsaydı belə ona kredit verilməyəcəkdi.

Buna özü də şübhə etməyib və siyasi hakimiyyətin münasibəti də ortadadır. Nəticədə işləri yarımçıq qalan R.Qasımov zərər edib.

“Aqua Agro” MMC-nin ilk təsisçisi onun xahişi ilə Cəfərov Məmməd İsa oğlu olub. Cəfərov Məmmədi 2000-ci ildən tanıyıb. Onunla uzun müddət şərikli taxta biznesi ilə məşğul olduğundan aralarında partnyorluq münasibətləri yaranıb.

Bu səbəbdən Məmməd Cəfərov onunla “Aqua Agro” MMC-nin balıqçılıq təsərrüfatının tikintisinə şərik olmağa razılıq verib. Həmin tikintiyə sərf edilən vəsaitin təxminən 450 000 manatı Məmməd Cəfərov tərəfindən, qalan hissəsi isə onun tərəfindən ödənilib.

2014-cü ilin dekabr ayının 21-də ölkədə baş verən devalvasiyasından sonra Məmməd Cəfərovun maliyyə vəziyyəti bir qədər çətinləşib və balıqçılıq təsərrüfatının tikintisi işindən çıxmaq qərarına gəlib.

Həmçinin öz qoyduğu vəsaiti qaytarmasını istəyib. O, sonuncunun tikintiyə qoyduğu vəsaiti birdən qaytarmaq imkanında olmadığını bildirib.

Məmməd Cəfərovla onun sərf etdiyi vəsaiti hissə-hissə qaytarmaq barədə razılığa gələrək ilk olaraq Rusiyanın Sverdlovsk vilayətinin Verxoturye şəhərində yerləşən taxta sexindən ayda 5 vaqon taxta gətirib sataraq ödəmək barədə razılaşıblar.

Lakin taxta alqı-satqısı zəiflədiyindən Məmməd Cəfərov qoyduğu vəsaitin qaytarılmasını tezləşdirməsini xahiş edib. O da bu məqsədlə 2015-ci ilin aprel ayında SKMF-dan kredit götürə bilmək üçün “Aqua Agro” MMC-ni qayınanası Çovdarova İbadət Rza qızının adına keçirib.

Çünki “Bəhrə 2010” MMC də qayınanası İbadət Çovdarovanın adına olub və kredit götürə bilmək üçün kredit mütəxəssislərinə fəaliyyət göstərən şirkət göstərmək lazım gəlib.

Mütəxəssislərin məsləhəti əsasında “Aqua Agro” MMC-nin yerləşdiyi torpaq sahəsi ilk təsisçi Cəfər Məmmədovun adından çıxarılaraq 06.10.2015-ci ildə İbadət Çovdarovanın adına rəsmiləşib.

Məmməd Cəfərovun təxminən 57.000 manatını qaytarıb.Lakin M.Cəfərov bu işdən təmiz çıxsa da, Çovdarovlar ailəsi zərər edib, balıqçılıq təsərrüfatı iflas edib.

Şərhlər

XƏBƏR LENTİ