SON DƏQİQƏ
XalqXeber.Az » Bölgə » Fazil Məmmədovun kadrı Alimpaşa Məmmədovdan məhkəmə qərarına hörmətsizlik – ŞİKAYƏT

Fazil Məmmədovun kadrı Alimpaşa Məmmədovdan məhkəmə qərarına hörmətsizlik – ŞİKAYƏT

Tarix:

9-01-2018, 16:03

/ 2 514 dəfə oxundu.
Fazil Məmmədovun kadrı Alimpaşa Məmmədovdan məhkəmə qərarına hörmətsizlik – ŞİKAYƏT

Alimpaşa Məmmədov cinayət məsuliyyətinə cəlb olunacaqmı?

Məmurlar qanunların aliliyinə hörmət və əməl etməklə sadə vətəndaşlara nümunə olmalıdırlar. Prezident İlham Əliyev də dəfələrlə məmurlardan qanunlara hörmət etməyi tələb etsə də, bəzi hallarda yerli məmurların dövlət başçısının bu tələbinin tam əksinə hərəkət etdiyinin şahidi oluruq. Ekspertlər hesab edir ki, bunun əsas səbəbi bəzi yerli məmurların ayrı-ayrı oliqarxları təmsil etməsidir. Odur ki, həmin məmurlar üçün dövlət başçısının göstəriş və tövsiyələri əsas deyil. Onlar bir qayda olaraq öz "boss”larının əmr və göstərişlərini əsas götürürlər. Bu "boss”lar isə qanunlara hörmətsizliyi ilə seçilirlər.
Bunun ən bariz nümunəsini sabiq vergilər naziri Fazil Məmmədovun doğma rayonu olan Şəmkirə icra başçısı təyin etdirməyə nail olduğu kadrı Alimpaşa Məmmədovun məhkəmə qərarlarına hörmətsizliyində görmək olar. Məlum olduğu kimi, Fazil Məmmədov fəaliyyətində qanun pozuntularına yol verdiyi üçün dövlət başçısının sərəncamı ilə vergilər naziri vəzifəsindən kənarlaşdırıldı. Fazil Məmmədovun fəaliyyəti zamanı yol verdiyi qanun pozuntuları ən yükəsk səviyyədə tənqid olunduğu, qiymətləndirildiyi üçün bu mövzuya geniş toxunmuruq.
Redaksiyamıza daxil olan bir məlumatda Fazil Məmmdovun kadrı, Şəmkir rayon İcra Hakimiyyətinin başçısı Alimpaşa Məmmədovun qanunlara hörmətsizliyindən söz açılır. Belə ki, hələ Alimpaşa Məmmədovdan əvvəl onun sələfi Nazim Veyisov sahibkar Vahid Fazil oğlu Cəfərovun doğma kəndindəki iaşə obyektini məhkəmə qərarı olmadan sökdürüb. Şəmkir rayonunun sabiq icra başçısı Nazim Veyisovun vətəndaşın Konstitusiya ilə təsbit olunmuş mülkiyyət toxunulmazlığı hüququnu tapdalaması və bununla qanunları kobud pozmasını araşdırmağa, sabiq icra başçısının bu əməlində cinayət tərkibi olub-olmamasına aydınlıq gətirməyə çalışacağıq. Hələlik isə onu qeyd edək ki, Nazim Veyisov sahibkarın qanuni obyektini sökdürməklə kifayətlənməyib. Vahid Cəfərovun iddiasına görə, obyekti söküləndən sonra, o zaman icra başçısı olan Nazim Veyisovun göstərişi ilə Şəmkir rayon polis şöbəsində böhtana məruz qalıb. Belə ki, işadamı rəis müavininin xidməti otağında dörd nəfər polis əməkdaşına xəsarət yetirməkdə ittiham olunub və həbs edilib. Məhkəmənin qərarı ilə 3,6 il müddətinə azadlıqdan məhrum edilib.
Onu da qeyd edək ki, bu zaman Vahid Cəfərov bələdiyyə üzvü olub. Ümumiyyətlə, Vahid Cəfərov Şəmkirdə yalnız işadmı kimi tanınmayıb. O, Azərbaycanın ərazi bütövlünün qorunması üçün tərəddüd etmədən əlinə silah alan rayon sakinlərindən biridir. Ömrünün dörd ilini vətənin müdafiəsinə həsr edən bir şəxsin qanuni mülkiyyəti isə bir gün də olsun vətənin müdfiəsində iştirak etməyən şəxslər tərəfindən sökülüb. Vahid Cəfərov vətənin təssübünü çəkən vətəndaş olmaqla yanaşı, həm də xeyriyyəçi kimi də tanınıb. O, daima gəlirinin bir hissəsini xeyriyyəçəlik işlərinə sərf edib. Lakin bütün bunlar məmurların Vahid Cəfərova qarşı oyun qurmasına mane olmayıb. Onların oyunbazlığının qurbanı olan Vahid Cəfərov təxminən 2.6 ildən sonra azadlığa çıxır və qanun müstəvisində öz haqqını müdafiə etməyə çalışır. "Haqq nazilər, amma üzülməz” deyiblər, atalar. Vahid Cəfərov məhkəmədə öz haqqını müdafiə edə bilir və Gəncə Apellyasiya Məhkəməsi də qanunlara hörmətlə yanaşaraq onun haqlarını bərpa edir. Sonradan Ali Məhkəmə də Gəncə Apellyasiya Məhkəməsinin qərarını qüvvədə saxlayır və Şəmkir rayon İcra Hakimiyyətinin Vahid Cəfərova 46 min 158 manat ödəməsinə qərar verir. Ancaq Ali Məhkəmənin bu qərarını bu dəfə də Nazim Veyisovun xələfi, Fazil Məmmədovun kadrı Alimpaşa Məmmədov hörmətsizlik edərək, icra etmir. Baxmayaraq ki, icra başçısının bu əməli Cinayət Məcəlləsində çinayət əməli kimi tövsif olunub. Cinayət Məcəlləsinin 306.1-ci maddəsinin tələblərinə görə isə, qanuni qüvvəyə minmiş məhkəmə qətnaməsini, hökmünü, qərardadını və ya qərarını qərəzli olaraq icra etməmə və ya həmin məhkəmə aktlarının icrasına maneçilik törətməyə görə cinayət məsuliyyəti nəzərdə tutulmuşdur.
Şəmkir rayon İcra Hakimiyyətinin başçısı Alimpaşa Məmmədovun məhkəmənin qərarına əməl etməməsinə Şəmkir rayon İcra Qrupunun dözümlü yanaşmasını da anlamaq mümkün deyil. Ancaq haqqın nazilsə də üzülməyəcəyinə inan Vahid Cəfərov ədliyyə naziri Fikrət Məmmədovun qanun pozuntusuna son qoyacağına, gec də olsa Ali Məhkəminin qərarının icrasını təmin edəcəyinə inanır.
Şəmkir rayonun sabiq icra və hazırkı icra başçıları - Nazim Veyisov və Alimpaşa Məmmədovun qanunlar qarşısında cavab verəcəyinə biz də inanırıq. İnanırıq ki, prezident İlham Əliyev, Birinci vitse-prezident Mehriban xanım Əliyeva heç bir məmurun qanunlardan üstdə durmadığını Azərbaycan ictimaiyyətinə sübut edəcək.

P.S. Şəmkir rayonunun sabiq icra başçısı Nazim Veyisovun sahibkar Vahid Cəfərova qarşı qərəzinin tarixçəsinə isə növbəti yazımızda aydınlıq gətirəcəyik.
P.P.S. Yazıda adları keçən şəxslərin, Şəmkir rayonunun sabiq icra və hazırkı icra başçıları - Nazim Veyisov və Alimpaşa Məmmədovun deməyə sözü varsa, onların da mövqeyini dinləməyə hazırıq.

SOZCU.İNFO

Şərhlər

XƏBƏR LENTİ