Hazırda sabiq vergilər naziri Fazil Məmmədovun biznes və icra strukturlarındakı setində təmizləmə əməliyyatlarına start verilib. İlk növbədə onun nəzarətində olan icra hakimiyyəti başçılarının fəaliyyəti ilə bağlı təftişlərə başlanlıb. Bu barədə istiqlal.az-a hakimiyyətdəki mənbələrdən məlumat daxil olub.
Mənbənin məlumatına görə, F.Məmmədovun nüfuz dairəsinə 5 rayon (Gədəbəy, Yardımlı, İsmayıllı, Şəmkir və Binəqədinin icra başçıları F.Məmmədovun keçmiş işçiləridir) daxil olsa da, təşftiş əsasən Binəqədi, Gədəbəy və Şəmkir rayonlarını əhatə edir: “Çirkli pulların yuyulması və büdcədən fantastik mənimsəmələr məhz bu rayonlarda həyata keçirilib. Odur ki, bu rayonlarda icra başçılarının əməllərni təftişi ilə bağlı hüquq-mühafizə orqanlarının yerli şöbələrinə tapşırıq verilib. Hər 3 rayonda sabiq nazirə və icra başçılarına aid mülklərin, torpaq sahələrinin, şirkətlərin siyahısı dəqiqləşdirilir, eyni zamanda şübhəli bank əməliyyatları araşdırılır”.
Mənbənin iddiasına görə, çox yaxın zamanlarda hər 3 rayonun icra başçıları işdən çıxarılacaq: “Onlar haqqında siyasi qərar artıq var, sadəcə təftişin yekunlaşmasını gözləyirlər”.
İstiqlal.az xatırladır ki, Binəqədi rayon İcra Hakimiyyətinin başçısı Xaləddin İsgəndərov Fazil Məmmədovun bacısının həyat yoldaşıdır.
Şəmkirin icra başçısı Alimpaşa Məmmədov və Gədəbəyin icra başçısı Ramiz Yediyarov isə sabiq vergi məmurlarıdır və F.Məmmədovun "vuran əli” sayılıblar.
