Beyləqan maliyyə idarəsi rəisi İslam Allahverdiyevin vəziyyəti pisləşib. Onun sözün hər iki mənasında əhvalı ağırdır. Bir tərəfdən icra başçısı Vaqif Abdullayevin işdən çıxarılması, bir tərəfdən maliyyə təftişi səhhətinə təsir edib.
Məlumata görə, Beyləqanın maliyyə rəisi keçmiş icra hakiminin yeyintilərinin məsuliyyətini daşıyır. Mozalan.az yazıb ki, İ.Allahverdiyev qəfil xəstələnib. Onu Bakıya getdiyi deyilir.
Şəfasını xəstəxanada yoxsa hamilərinin yanında axtarması sirr olaraq qalır. Onun belə işlərdə “təcrübəsi” zəngindir. Dəfələrlə düşdüyü işlərdə "sudan quru" çıxmağı bacarıb.
Bir vaxtlar “Kapital Bank”ın filial direktoru işləyən maliyyə rəisinin bankın adı ilə külli miqdarda vəsaiti kredit şəklində yüksək faizlə vətəndaşlara verdiyi və maxinasiyadan il ərzində yüz min manatlarla qazanc əldə etdiyi üzə çıxmışdı.
Sonra bankdakı vəzifəsindən qovulan Allahverdiyev özünə 2 həftə ərzində Xocavənd maliyyə idarəsinin rəisi vəzifəsini tapa bilmişdi.
Xocavənd sakinlərinin iddiasına görə rayon maliyyə idarəsinin müdiri keçmək İslam Allahverdiyevə 100 min manata başa gəldi. Deyilənə görə vəsaitin yarısı rayon, yarısı isə Maliyyə Nazirliyinin rəhbərliyinə xərcləndi.
Az keçmiş İslam Allahverdiyevin Xocavənd maliyyə idarəsində sələmlə məşğul olması barədə saytlarda silsilə yazılar dərc edildi.
Xocavəndəki maliyyə idarəsinin müdiri sələm işini davam etdirir və demək olar ki, Beyləqan, Xocavənd, hətta Füzuli rayonun bir çox məmurları, idarə müdirləri təcili pul lazım olanda İslam Allahverdiyevin yardımından bəhrələnirlər.
Maliyyə idarəsinin müdiri isə öz növbəsində 8 faizlə məmurlara sələm verirmiş. Beyləqan Maliyyə İdarəsinin sabiq müdiri Oqtay Hacıyevin rayon əhalisinə hələ də məlum olmayan səbəbə görə işdən azad olunduqdan dərhal sonra, icra başçısının istəmədiyi halda, Xocavənddən Beyləqana müdir kimi transfer olunur.
Buna görə də daim Beyləqanın keçmiş icra başçısı Vaqif Abdullayevlə onun arasında ciddi narazılıqlar olub. İcra başçısı maliyyə idarəsinin müdirinin "sələm biznesi"ndən yaxşı qazanc əldə etdiyini önə çəkərək İslam Allahverdiyevin daim onu aldatdığını deyirmiş.
İslam Allahverdiyev isə hər yerdə icra başçısı Vaqif Abdullayevdən ciddi narazılıq edirmiş. Allahverdiyevin rayonun ən varlı şəxslərindən biri olmasından və sələm biznesindən yaxşı qazanc əldə etməsindən xəbərdar olan keçmiş icra başçısı idarə müdirini daim təzyiq altında saxlayırmış.
Buna görə də İ. Allahverdiyev tez-tez yaxın qohumlarının yanında Beyləqan maliyyəsinə müdir gəlməkdə böyük səhv etdiyini, 10 saylı Regional Maliyyə Müfəttişliyinin rəisi Ədalət Nəbiyevin onu aldatdığını və icra başçısı Vaqif Abdullayevlə birlikdə işləməyin çox çətin, əzablı olduğunu dilə gətirirmiş.
Lakin bütün hallarda Abdullayevin maxinasiyalarında onun da imzası olub, hər nə qədər şikayətlənsə də külli-miqdarda qazanc əldə edib.
Son bir ildə İslam Allahverdiyev əlindəki 1 milyon manata yaxın vəsaiti Bakı şəhərində bir neçə obyekt və ev alınmasına yatırıb. İdarə müdirinin təkcə Beyləqanda 200 hektar torpaq sahəsi və 1500 baş qoyunu qaldığı deyilir.
Hələlik maliyyə rəisinin gələcəyi şübhə altındadır. Sabiq başçının xidmət dövrü total araşdırma ərəfəsindədir.
İslam Allahverdiyev 10 saylı Regional Maliyyə Müfəttişliyinin rəisi Ədalət Nəbiyevlə əlbir şəkildə çalışır və bu ikili bir çox təşkilatlara qarşı əsassız yoxlamalar apararaq onlardan “aylıq” tələb edirlər ki, onların bu “əməliyyatları” təkcə Beyləqan rayonu ilə əhatələnmir.
Məlumata görə 10 saylı Regional Maliyyə Müfəttişliyinin təşkilatlarda apardığı maliyyə yoxlamalarında İslam Allahverdiyev sadəcə olaraq “mələk” libası geyinərək vasitəçi, barışdırıcı rolunu oynayır.
Yəni yoxlanılan büdcə təşkilatının probleminin yoluna qoyulmasında Ədalət Nəbiyevlə idarə rəhbəri arasında əlaqələndirici rolunda çıxış edir.
İddiaya görə bu roluna görə öz faizini alan İslam Allahverdiyev yaxın ətrafı ilə söhbətdə həmişə 10 saylı Regional Maliyyə Müfəttişliyi rəisi Ədalət Nəbiyevdən payını kəsməsi iddiası ilə narazılıq da edir.
Bizimdovr.az-a daxil olan məlumatda vurğulanır ki, İslam Allahverdiyev Xocavənddə işlədiyi vaxt bəzi qalmaqalları ilə tanınıb. Həmin qalmaqallardan biri də məşhur “çəlik” məsələsidir ki, bu qalmaqal İslam Allahverdiyevi 10 min manata qədər ziyana salıb.
Həmin hadisənin şahidləri idda edirlər ki, Xocavəndin keçmiş baş həkimi Nürəngiz Bəşirova olmasaydı bəlkə də İslam Allahverdiyevə zorakılıq maddəsi ilə cinayət işi açılacaqdı. Bu isə onun karyerasının üstündən birdəfəlik xətt çəkmək demək idi.
Qarşı tərəfin də mövqeyini dinləməyə hazırıq.
Cahan.info
