Millətimizin çox ibrətamiz deyimlərindən biri də həbsxanada olan məhkuma "Allah qapısını açsın" duasıdır. Bu baxımdan biz aşağıda barəsində söhbət açılan məşhur məhkum, "Canik" ləqəbi ilə çağırılan Beynəlxalq Bankın keçmiş sədri Cahangir Hacıyevə də eyni duanı etmək olar. Amma onu da unutmamaq lazımdır ki, zamanında Eldar Mahmudovla qudalıq münasibətlərindən sui-istifadə edərək nəinki rəhbəri olduğu qurumu, bütövlükdə ölkənin bank sisteminin anasını ağlar qoyanda bu günləri göz önünə gətirməliydi. Bu gün məmləkətdə elə bir ailə tapılmaz ki, onun banklara borcu olmasın və bu və ya digər formada banklardan incik düşməsin. Bax Cahangir Əsgərov da əsas baiskarlardan biridir. Bunu təkcə bank sektoruna yaxın mənbələr deyil, aşağı-yuxarı hər kəs bilir və məhz C. Əsgərovun günahı üzündən ötənlərdə üzləşdiklərini bir ömür boyu unudası deyil.
Bu gün bacısı fəryad edir ki, qardaşını həbsxanada ac saxlayırlar. Ola bilsin ki, iddialarda müəyyən qədər həqiqəqt payı da var, yəni ən azı bəlli səbəblərdən pulu olsa belə istədiyini yeyə bilmir. Amma görəsən o həbsxanda düşünürmü neçə-neçə adamın məhz onun intəhasız iştahası üzündən işindən-gücündən, evindən-eşiyindən, varından-yoxundan olmasındakı "xidmətlər"ini? Təbii ki, düşünməmiş deyil. Amma heç şübhəsiz, artıq hər şeyin çox gec olduğunun da fərqindədir. İstənilən halda ona yenə də "Allah qapısını açsın" deyirik. Ümid edirik ki, həbsxanadakı məhkumluğunu başa vuraraq bədəlini sonadək ödəyə bilməyəcəyi günahlarının bağışlanması üçün Allah ona zaman və fürsət tanıyacaq...
İndi isə Apolitika.info saytına istinadən Cahangir Hacıyevlə bağlı materialı Dia.az oxucularına təqdim edirik:
“Uzaqbaşı, vəkilliyi əlimdən alacaqsınız, qorxum yoxdur. Sanki şəxsi aclığa və xəstəliyə düçar edən vəkillər imiş"
Azərbaycan Beynəlxalq Bankının (ABB) İdarə Heyətinin sabiq sədri Cahangir Hacıyevin bacısı Əminə Hacıyeva mediaya açıqlamalarında iddia edir ki, qardaşını həbsdə ac saxlayırlar. “Sentyabrın 12-dən ona aparılan bağlama istintaq orqanının göstərişi ilə qəbul edilmir. Faktiki, qardaşımı ac saxlayıb ona işgəncə verirlər. 19 sentyabrda bir daha yemək apardıqda bildirdilər ki, guya Cahangir Hacıyev özü ərizə yazaraq, yeməkdən imtina edib. Yeməyi qəbul etmədilər.
Biz vəkil Aqil Layıcdan xahiş etdik ki, gedib onunla danışsın, aclıq aksiyasının qarşısını alsın. Elə bilirdik ki, 15 sentyabrdan Cahangir Hacıyev aclıq aksiyası keçirir. Lakin məlum oldu ki, onu yeməkdən, həm də ailə üzvləri ilə telefon danışığından məhrum ediblər. Vəkil qardaşımla görüşəndən sonra bəlli oldu ki, o, yeməkdən imtina etməsi haqda ərizə yazmayıb, onu cəza olaraq, aclığa məhkum ediblər”.
Bacısının sözlərinə görə, C.Hacıyev haqqındakı 360 cildlik, 100 min səhifədən çox cinayət işi ilə tanış olmaq üçün kifayət qədər vaxt istəyir, istintaq orqanı razılaşmır: “Təsəvvür edin, 360 cildlik iş, hər cilddə də 300 səhifə var. Bunu bir neçə günə bitirmək mümkündürmü? Şəxs öz hüquqlarından istifadə edəndə onu cəzalandırarlarmı?!”
Vəkil Aqil Layıcov sentyabrın 22-də facebook səhifəsində ona qarşı təzyiqlər, hədə-qorxu barədə fikirlərini paylaşıb: “Həbsdə camaatın yanına yeməyini, əsas dərmanlarını buraxma, həmin şəxsi ac saxla, faktiki aclığa məhkum et, sonra da olanları vəkilin üstünə at, vəkilə hədə-qorxu gəl. Uzaqbaşı, vəkilliyi əlimdən alacaqsınız, qorxum yoxdur. Sanki şəxsi aclığa və xəstəliyə düçar edən vəkillər imiş. Sonra da şəxsin vəziyyəti pisləşəndə vəkildən yardım istə. Elə bil, vəkilin yemək buraxmamaq, sovqat qəbul etmək və ya etməmək kimi səlahiyyətləri var. Ayıbdır və artıq kulminasiya nöqtəsidir…”
A.Layıcov AzadlıqRadiosuna bu yazıda söhbətin konkret hansı dustaq və vəkilindən getdiyini də açıqlamaq istəməyib. Ancaq yazının məzmunundan söhbətin onun özündən və müvəkkili olan Beynəlxalq Bankın sabiq rəhbəri Cahangir Hacıyevdən getdiyi ehtimal olunur. “Uzaqbaşı, vəkilliyi əlimdən alacaqsınız” cümləsi məhz onun özünün təzyiqlərlə üzləşdiyini deməyə əsas verir. Radionun əldə etdiyi məlumata görə, A.Layıcov Vəkillər Kollegiyasından uzaqlaşdırılmaq təhlükəsi ilə üzləşib və məqsəd də onu elə C.Hacıyevin işinə görə cəzalandırmaqdır. “Vəkillər Kollegiyası rəhbərliyinə A.Layıcovun cəzalandırılması üçün müraciət olunub. Cahangir Hacıyevlə bağlı yeni cinayət işinin istintaqında Aqil Layıcovun davranışı – müvəkkilinin mövqeyini müdafiə etməsi, geri çəkilməməsi istintaq orqanını narazı salıb. Ona görə kollegiya rəhbərliyinə şikayət olunub ki, onu cəzalandırsınlar”, – radionun əldə etdiyi məlumatda belə deyilir.
A.Layıcov özü xəbəri nə təsdiq, nə də təkzib edib. Bildirib ki, bu barədə, ümumiyyətlə, danışmaq istəmir. Penitensiar Xidmət isə təcridxanada C.Hacıyevin təzyiqlərlə üzləşməsi, hüquqlarının pozulması barədə deyilənləri qəbul etmir. Qurumun ictimaiyyətlə əlaqələr şöbəsinin rəhbəri Mehman Sadıqov Azadlıq Radiosuna deyib ki, başqa məhkumlara münasibət necədirsə, C.Hacıyevlə də o cür davranılır: “Bizim üçün onun digər məhkumlardan fərqi yoxdur. Hamıya necə, ona da elə. O da daxili intizam qaydalarına əməl etməlidir. Qanunvericilikdə məhkumlar üçün nə qədər görüş, telefon danışığı nəzərdə tutulubsa, o da o qədər istifadə edir”.
M.Sadıqov əlavə edib ki, C.Hacıyev aclıq etsəydi, yəqin ki, Penitensiar Xidmətin bundan xəbəri olardı.
Vəkillər Kollegiyası Rəyasət Heyətinin sədri Anar Bağırov isə radioya bildirib ki, prokurorluqdan və ya DİN-in Baş Mütəşəkkil Cinayətkarlıqla Mübarizə İdarəsindən (C.Hacıyev haqqında cinayət işinin istintaqı bu idarədə aparılıb-red.) A.Layıcov barədə hər hansı şikayət daxil olmayıb: “Aqil Layıcovla bağlı bizdə başqa intizam işi var, uzun müddətdir araşdırılır. İntizam Komissiyası vəkilin özünün iştirakı ilə araşdırma aparır. Həmin şikayətin halları barədə məlumat verə bilmərəm. Çünki bu, vəkil sirrini təşkil edən məlumatlardır. Ancaq prokurorluqdan və ya Mütəşəkkil Cinayətkarlıqla Mübarizə İdarəsindən bizə onunla bağlı şikayət daxil olmayıb”.
2015-ci ilin dekabrında həbs edilən C.Hacıyev mənimsəmə, vəzifə səlahiyyətlərindən sui-istifadə etmə və başqa əməllərdə suçlanaraq, 15 il azadlıqdan məhrum edilib. Ancaq o, ittihamları qəbul etmir.
Qeyd edək ki, Anar Bağırov Vəkillər Kollegiyası Rəyasət Heyətinin sədri gətirildikdən sonra Azərbaycanda müstəqil mövqe nümayiş etdirən vəkillərin əksəriyyətinin ya fəaliyyətinə son verilib, ya da özləri vəkillikdən gediblər. Ekspertlər ölkədə vəkillik inistutunun artıq tam sıradan çıxarılmaq üzrə olduğunu bildirirlər.
