Keçmiş Milli Təhlükəsizlik Nazirliyinin xüsusi təyinatlılarının qurbanına çevrilmiş İsmayılovlar ailəsi 3 ildir ki, çarəsiz durumda qalıb. Haqlarını tələb etdiklərinə görə isə ona və ailəsinə qarşı təzyiqlərin ardı-arası kəsilmir. Üz tutmadıqları, müraciət etmədikləri dövlət qurumu qalmayıb. Amma illərdir ki, şikayətlərinə nə baxan, nə də obyektiv araşdıran var. Baş verənlərlə bağlı “Cümhuriyət” qəzetinə müraciət edən Yasamal rayon sakini Elmidar İsmayılov ölkənin məhkəmə sistemindən və dövlət qurumlarından gileylənib.
O deyib ki, 7 yanvar 2014-cü ildə atası Məhərrəm İsmayılov özünə məxsus “Jiquli” markalı maşınla kürəkəninin yas mərasimindən qayıdarkən “Kia Optima” markalı avtomaşınla toqquşub: “Hadisə zamanı xəsarət alan olmayıb. Sadəcə olaraq hər iki avtomobilə yüngül zərər dəyib. Günah atamda yox, “KİA”nın sürücüsündə olub. Həmin avtomobildə 5 nəfər olub, hamısı da içkili imiş. Atam qəza ilə bağlı mənə xəbər etdi və hadisə yerinə getdim. Olay yerinə çatanda gördüm ki, “KİA” da olan 5 nəfər atamı hədələyərək sənədlərini tələb edirlər. Həmin vaxt hadisə yerində polis əməkdaşları da yox idi. Atama təzyiq etdiklərini görüb yaxınlaşdım ki, “Siz kimsiniz, qanun-qayda var”. Elə bunu demişdim ki, məni döyməyə başladılar. Atam müdaxilə edəndə avtomobildə olan beş nəfər idmançı görkəmli mülki şəxs MTN əməkdaşı olduqlarını deyərək, atamı döyməyə başladılar. Döydükləri zaman atamın ayağını və dişlərini sındırdılar. Həmin şəxslər isə “gedin, nə istəyirsiniz edin, onsuz da bizə heç nə edə bilməzsiniz, bizim arxamız güclüdür”- deyə bizi təhdid edirdilər. Hadisə yerinə dost və qonşularım gələndən sonra polis və təcili yardım çağırıldı”.
Döyülən də, söyülən də, şərlənən də bizik…
Elmidar İsmayılovun sözlərinə görə sonradan məlum olub ki, “KİA”-nın sahibi İnqilab Rzayev MTN-in “Qartal” Xüsusi Təyinatlı Dəstəsinin generalı Ceyhun Rzayevin qardaşıdır: “Hadisədən sonra Ceyhun Rzayev mənim qohumumla əlaqəyə girib. Biz o ərəfədə xəstəxanada idik. Ceyhun Rzayev bibim oğlu ilə Naxçıvanda sinif yoldaşı olublar. Bir müddət sonra həmin 5 nəfərlə Aydın adında saqqallı şəxs yanıma gəlib şikayətçi olmamağımı tələb edirlər. Mən həmin o 5 nəfəri qəbul etmədim. Sonradan mənə məlum olur ki, Aydın general Ceyhun Rzayevin əməkdaşıdır. Ceyhun Rzayev və əməkdaşları bugünədək də mənimlə prinsip aparırlar. Dəfələrlə atamla da görüşüb bildirirlər ki, şikayətçi olmasaq, ziyanımızı ödəyəcəklər, amma razı olmuruq. Xəstəxanada ola-ola da müstəntiq izahatımızı gəlib almır. Özümüz “Qaynar xətt”ə zəng edəndən sonra müstəntiq izahat almağa məcbur olur. Qəzadan 7 ay sonra mənə və atama qarşı cinayət işi açıblar. Açılan cinayət işinə görə bizi MTN Baş Xüsusi Təyinatlılar İdarəsinin “QARTAL” – məxfi qurumunun 5 nəfər əməkdaşını döyməkdə ittiham edirlər. Ailəmizə qarşı isə şər atdılar ki, guya 5 xüsusi təyinatlını 57 yaşlı atamla mən döymüşük. Söyülən də, döyülən də, şərlənən də bizik. Məni və ailəmi çıxılmaz vəziyyətdə qoyublar, həyatımızı məhv ediblər. Xəstə qardaşım, himayəmizdə olan həyat yoldaşı rəhmətə getmiş bacımı, onun azyaşlı körpəsini çörəksiz qoyublar”.
Səksəkədə yaşayan ailə…
Hadisədən sonra İsmayılovlar dəfələrlə sabiq nazir Eldar Mahmudovun qəbulunda olmaq üçün ona məktub və teleqramla müraciət ediblər. Ərizə və müraciətlərinə cavab verilmədiyini görən Elmidar İsmayılov isə özü MTN-ə gedib, lakin onu əraziyə yaxın belə buraxmayıblar. İsmayılovlar ailəsini başına bu qurum tərəfindən min bir oyun gətirilib.
Şikayətçinin dediyinə görə, 3 ildir ki, baş verənlərlə bağlı müxtəlif yüsək instansiyalara çoxsaylı müraciətlər ediblər, amma onlara qarşı aparılan qanunsuz təzyiqlərə son qoyulmayıb. O cümlədən, Gürcüstan və Türkiyədəki Azərbaycan səfiriliklərində müəyyən aksiya təşkil edib, məktubla müraciət ünvanlayıblar. Müraciətdə isə haqsızlıqla üzləşdiklərini, barələrindəki cinayət işinin saxta olduğunu vurğulayıblar.
Məsələ ictimailəşəndən və çoxsaylı müraciətlərdən sonra qismən nəticə verib: “Avtoqəza ilə bağlı cinayət işi Yasamal Rayon Məhkəməsində araşdırılıb. Cinayət Məcəlləsinin 263-cü maddəsilə ilə təqsirli bilinən atama, 127. 2.3-cü (qəsdən sağlamlığa az ağır zərər vurma) maddəsi ilə isə mənə bəraət verilib. Mənə dəymiş maddi və mənəvi zərərə görə 30 min manat təzminat tələb edirəm. Elə bu səbəbdən də illərdir ki, hədə-qorxu və təhdidlərlə yaşayıram. Heç bir yerdə məni və atamı işə qəbul etmirlər. Baxmayraq ki, fevralın 18-də bir qrup şikayətçi ilə birlikdə Dövlət Təhlükəsizlik Xidmətinin rəisi Mədət Quliyevin qəbulunda (3-cü dəfə) olarkən, şikayətçilərin yanında dedim ki, cənab Mədət Quliyev, bilirəm ki, həmin bu 5 nəfərin (İnqlab Rzayev, Fəqan Əliyev, Bəhruz Məmmədov, Hidayət Kazımov, Toğrul Mirzəyev) arxasında Ceyhun Rzayev dayanır”.
Şikayətçi əlavə edib ki, haqqının tələb edilməsi üçün Daxili işlər naziri Ramil Usubovun, Ombudsman Elmira Süleymanovanın, Dövlət Təhlükəsizlik Xidmətinin rəisi Mədət Quluyevin qəbulunda olub. Daha sonra prezidentə məktubla müraciət edib. Dəfələrlə müxtəlif tipli aksiyalarda iştirak edərək ədalətin bərpasını tələb edib. Şikayətçi hələ də barələrində saxta cinayət işi başladan şəxslərlə bağlı heç bir tədbir görülmədiyindən narahatdır: “Əgər hüquqlarım tanınmasa, ya məni Azərbaycanın bətnindən abort etsinlər, ya da vətənimdə özümü yandıracağam”.
