“Tanınmış idmançı 8 ildir günahsız yerə həbsə atılıb?” başlıqlı yazının dərcindən sonra redaksiyamıza bir qrup şikayətçi gəlib. Onlar ölkə başçısına etdikləri müraciəti “Hürriyyət” qəzeti və Hurriyyet.org saytı vasitəsilə işıqlandırılmasını xahiş ediblər.
Qeyd edək ki, “Tanınmış idmançı 8 ildir günahsız yerə həbsə atılıb?” yazısında Şəki rayon Qoxmuq kənd sakini, təqaüdçü müəllim Hacər Maqsudinin ölkə başçısına ünvanladığı və mətbuatda yayımlanan müraciətində tanınmış idmançı, Qarabağ müharibəsi veteranı olan oğlu Azad Məmmədovun günahsız yerə həbsə atılması yer alıb. 3 uşaq atası olan oğlunun şərlənərək həbs olunduğunu yazan ananın sözlərinə görə, oğlunun azadlığa çıxması üçün prezidentə etdiyi video-müraciətdə heç bir təhqir elementi olmadığı halda, oğlunun həbsində təqsirli bildiyi qarşı tərəf öz şərəf-ləyaqətinin müdafiəsi maddəsilə ondan və digər 4 qadından 1 milyon manat məblğində təzminat istəyir.
Həcər Maqsudinin bəhs elədiyi 4 qadın - Gülxarə Səfərova, Həqiqət Yusubova, Gülxar Sadıqova, Bəsdi İsmayılova da bildirirlər ki, vəkil Elçin Sadıqovla anası Sahibə Həsənova onlar haqqında haqsız yerə məhkəmə iddiası qaldırıb.
Redaksiyamıza gələn Gülxarə Səfərova, Həqiqət Yusubova, Gülxar Sadıqova dedilər ki, ötən ilin martında S.Həsənovanın törətdikləri əməllərlə bağlı keçirilən mətbuat konfransında zərərçəkən kimi iştirak ediblər. Onların redaksiyaya verdiyi ifadə aşağıdakı kimidir: “Mətbuat konfransının keçirilməsinə 2005-ci ildə itkin düşmüş Elsevər Əliyevin ölümündə S.Həsənovanın günahlandırılması və bu məsələnin 10 il sonra - 2015-ci ildə Xoşqədəm Hidayətqızının verilişində üzə çıxması səbəb olub.
Xoşqədəm Hidayətqızından 700 min manat təzminat tələb olunub?
Belə ki, Xoşqədəm Hidayətqızının ANS telekanalında apardığı “Sən tək deyilsən” verilişində günahlandırılan şəxs olan S.Həsənovanın qızı G.Sadıqova bu məsələni ictimailəşdirib. Bildirib ki, E.Əliyevin öldürülməsində anasının günahkar olmasına əmindir. Həmin verilişdə vəkil Adəm Məmmədov ekspert qismində iştirak edib. E.Əliyevin atası İsmayıl Əliyev vəkil A.Məmmədovdan xahiş edib ki, oğlunun haqlarını müdafiə etsin.
Verilişdən sonra S.Həsənova və oğlu E.Sadıqov şərəf və ləyaqətlərinin tapdanması iddiası ilə “ANS” telekanalı, Xoşqədəm Hidayəqtıqızı və Gülxar Sadıqova haqqında məhkəməyə müraciət edəcəklərini, 700 min manat məbləğində təzminat tələb edəcəklərini bildirərək, hədə-qorxu gəliblər.
Bundan sonra biz zərəçəkən olaraq cəsarətlənib öz haqqımızı geri almaq istəyilə jurnalist Seymur Verdizadənin iştirakı keçirilən mətbuat konfransında iştirak etdik”.
H.Yusubovanın sözlərinə görə, 2007-ci ildə evini “Standartbank”a girov qoyaraq 29 min 700 manat məbləğində girov götürərək S.Həsənovaya borc verib ki, dəri biznesiylə məşğul olsunlar. Sonradan ona məlum olub ki, S.Həsənova onu aldadır: “S.Həsənova Bəsdi İsmayılovadan 6 min manat, Gülxarə Səfərovadan 500 manat və digər bir çox şəxslərdən pul alıb, qaytarmayıb. Pullarını istəyən Bəsdi, Minayə, Mahirə, Qənirə, Məlahət, Nərminə adlı qadınlara deyib ki, o bu pulları işbirliyinə girdiyi nüfuzlu idmançı Azad Məmmədova verib. Ona inananlar Azad Məmmədovun üzünə durublar. Sahibənin 6 min manat borc aldığı Bəsdi İsmayılova sonradan aldandığını başa düşüb və bunu mətbuat konfransında etiraf edib”.
G.Sadıqovanın dediklərinə görə, hadisə bu mətbuat konfransında bir daha ictimailəşəndən sonra qardaşı və anası onu və oğlu amansızlıqla qətlə yetirilən İsmayıl Əliyevi məhkəməyə veriblər ki, yalan ifadəyə görə şərəf-ləyaqətləri tapdanıb: “Bundan sonra 2016-cı ilin martında Bakı şəhər Prokurorluğunda müstəntiq Kamran Məmmədovun apardığı istintaq əməliyyatı nəticəsində mənim həmin verilişdə dediyim kimi Elsevər Əliyevin cəsədi doğranıb, yandırılmış şəkildə Bərdə rayonunda aşkarlandı.
Bundan sonra vəkil Adəm Məmmədov da mətbuat konfransı keçirdi.
Cəsəd aşkarlanandan və məsələ ictimailəşəndən sonra şərəf-ləyaqətlərini müdafiə edən vəkil və anası geri çəkildi”.
Amma ötən ilin fevralın 2-də yenidən mətbuat konfransında iştirak edən şikayətçilər – G.Səfərova, H.Yusubova, G.Sadıqova, B.İsmayılova yenə də S.Həsənova və oğlu E.Sadıqov Göygöl rayonunda məhkəməyə verilib: “Bir il bizi məhkəmədə süründürdülər, 2016-cı ilin dekabrında ədalətsiz qərar verildi, amma buna da qane olmayıb, qarşı tərəf bizdən 1 milyon təzminat istəyir”.
“Oğru elə bağırır, doğrunun bağrı yarılır”
Həqiqət Yusuobova: “Mən bilmirəm günahım nədir? Sahibə Həsənova həm evimin girovda qalmasına səbəb olub, həm 43 qram qızılımı mənimsəyib, onun üzündən 40 min manat borca düşmüşəm, haqqımı tələb edəndə isə məni məhkəməyə verib şərləyir. Oğru elə bağırır ki, doğrunun bağrı yarılır. Hətta mən mətbuat konfransında çıxış da eləməmişəm, kimsənin şərəfini əksildən söz deməmişəm. Hansı haqla məndən şikayət edilir? Ölkə başçısından xahiş edirəm, bu ana-balanın haqqında ölçü götürülməsinə kömək eləsin, bizdən əl çəksinlər, pulumuzu qaytarsınlar ”.
500 manat borc vermişəm, şərlənib 500 min manat təzminat da ödəməliyəm?
Gülxarə Səfərova: “Sahibə Həsənovaya verdiyim 500 manatımı geri istəmişəm. Borcumu istəyəndə bildirdi ki, gəl Azad Məmmədovun üzünə dur, de ki, Azada 12 min manat borc vermişəm, borcunu qaytarım. Bu vicdansızlığa getməmişəm. Mətbuat konfransında çıxış da etməmişəm, sadəcə, iştirak etmişəm. Şəkər, təzyiq xəstəsiyəm. Ürəyim xəstədir. 70 yaşlı adam 200 manat pensiya ilə, yaşımın bu çağında şərə, məhkəmələrə düşmüşəm. Bu qədər təzminatı necə və niyə ödəməliyəm?! Cənab prezident, mənə kömək edin”.
“Anam deyilən o qadın məni də öldürəcəyi ilə hədələyir”
Gülxar Sadıqova: “Mən heç kəsin şərəf-ləyaqətini təhqir etməmişəm. Bildiyim həqiqətlərin bir qismini açmışam. Dilim də gəlmir ona ana deyim. Məni dünyaya gətirən Sahibə 16 yaşımdaykən məni ərə verib. 2 övladım olub. Çalışmışam ki, həmişə ailəmi qoruyum. Amma keçmiş həyat yoldaşım Vüqar Yusifov anam deyilən Sahibəylə cinayət əlaqəsinə girib. Bunu əminliklə deyirəm.
Azad Məmmədov da Sahibənin fitvasına tuş gələn bir qurbandır. 3 övlad atası 8 ildir ki, həbsdədir. Mən bildiyim həqiqətləri geniş izahatla yazmışam, ölkə başçısına göndərmişəm. Susmadığım üçün anam deyilən o qadın məni də öldürəcəyi ilə hədələyir.
Məhkəmədən tələb edirlər ki, vəkil Adəm Məmmədovun keçirdiyi mətbuat konfransında onların barəsində səsləndirilən həqiqətlər guya yalan, şər, böhtan olduğu üçün, bu məlumatları yayan apa.az, modern.az, lent.az, basta.info saytlarından qaldırılsın.
“Mənə dəli damğası vurub susdurmaq istəsələr də, əlimdə sübutum var”
Ailəmizdə 6 övladıq. Qardaşım Elçin Sadıqov, vaxtilə Daxili İşlər Nazirliyində dəftərxana işçisi olan bacım Ceyhunə Sadıqova anamın törətdiyi bəd əməllərə şərik olub, susublar. Digər qardaş-bacım da ehtiyat eləyib, qorxub, haqsızlıqlara göz yumurlar. Mən isə haqqı pozulan, edilən bunca ədalətsizliklərə dözməyən biri kimi susmadığım üçün mənə “dəli” damğası vururlar. Budur baxın, mənim heç bir psixoloji problemimin olmaması haqqında əlimdə faktiki sübutum da var.
Möhtərəm prezidentimizdən qəzetiniz vasitəsilə də xahiş edirəm: Bir ailə mafiyası insanların qanunların aliliyinə güvənini azaldır. Xahiş edirəm, məhkəməyə və Sizə təqdim elədiyim izahatların sübuta yetirilməsi, araşdırlması üçün xüsusi komissiya təşkil olunsun”.
Vəkil Elçin Sadıqov: “Tələb edirik ki, iddiamız tam təmin olunsun”
Vəkil Elçin Sadıqovla əlaqə saxladıq. Bildirdi ki, anasının və onun şərəf-ləyaqətinin müdafiəsilə bağlı Göygöl rayon Məhkəməsində adıçəkilən şəxslər haqqında iddia qaldırıb. Məhkəmə onun və anasının iddiasını qismən təmin etdiyi üçün iş üzrə yenidən Gəncə Apelyasiya Məhkəməsinə müraciət ediblər: “Biz tələb eləyirik ki, iddiamız tam təmin olunsun”.
Xoşqədəmdən müəmmalı cavab...
Yazıda adıçəkilən Xoşqədəm Hidayətqızı ilə əlaqə saxlamaq istədik. Müxtəlif nömrələrdən mobil telefonuna bir neçə dəfə zəng etdik. Cavab almadıq. Tanımadığı nömrəni qaldırmadığını güman edib mesaj yazdıqdan sonra, zəngimizə cavab verdi. Telefondakı qadın səsi eynən öz səsi olsa da, (görünür, köməkçisinin səsi çox oxşar olub- müəl.) bizə dedi ki, danışan Xoşqədəm deyil, özü ilə əlaqə saxlayaq. Sonradan həmin nömrəyə təkrar zəngimizə isə belə cavab aldıq ki, Xəzər televiziyasının qaynar xəttinə müraciət eləyək(?).
Redaksiyadan: 5 şikayətçinin ölkə başçısına göndərdikləri, Apellyasiya Məhkəməsinin hakimi Loğman Süleymanova təqdim edəcəkləri geniş müraciətin surəti redaksiyamızın e-mailinə də göndərilib. Növbəti buraxılışlarımızda mövzuya qayıdarkən bunlardan bəhs olunacaq. Amma əslində biz redaksiya olaraq bu mövzunun heç də uzanmasını yox, tərəflərin razılığa gəlib, problemlərinin həllində maraqlıyıq. Çünki ittiham, münaqişə dolu bir mövzu onsuz da gərginlik yaşayan cəmiyyət üçün bir az da gərginlik yarada bilər. Amma “elin gözü tərəzidir prinsipilə” bu mövzunun ictimailəşməsi ona görə lazımdır ki, kimin haqlı, kimin haqsız olacağını müəyyənləşdirməli olan hüquq-mühafizə orqanları ictimai qınağa tuş gəlib hərəkətə keçsinlər. 12 il bundan öncə baş verən ölüm hadisəsinin iznə düşülüb, sonradan yarıda qalması və hər iki tərəfin şərə-böhtana məruz qalması iddiası hər halda hüquq-mühafizə orqanlarının – Daxili İşlər Nazirliyinin, Baş Prokurorluğun, Ədliyyə Nazirliyinin yerli orqanlarının fəaliyyətlərinin səriştəsizliyini üzə çıxarır.
Ona görə də təkcə elə münqaişə dolu bu hadisəyə müvafiq qurumların obyektiv yanaşması cəmiyyətin həmin qurumlara inamına zəmin yarada bilər.
huriyyet.org
